Чиныджы æмæ йæ авторы тыххæй дзы сæ хъуыдытæ раргом кодтой фысджытæ, æвзаг иртасджытæ
Поэт, публицист, литературон критик, фыcджыты æмæ журналистты Цæдисты уæнг Хохойты Энвер та бахаста ног æвæрæн Ирыстоны сфæлдыстады къæбицмæ. Йæ ног чиныг «Солнце бытия»-йы презентаци арæзт æрцыд Дзæуджыхъæуы фæсивæдон библиотекæйы. Чиныджы æмæ йæ авторы тыххæй дзы сæ хъуыдытæ раргом кодтой фысджытæ, æвзаг иртасджытæ. Уæвгæ фехъусынæй, фенын хуыздæр у. Презентацийы уыд Сосранты Жаннæ дæр, æмæ нæм фæхæццæ кæндзæн презентацийы цыды тыххæй æрмæг.
Йæ фæлмæн уд, æргом дзырд æмæ арф сагъæстæй хъæздыг чиныг. Афтæ зæгъæн ис Хохойты Энверы ног чиныгæй. Рухс федта йæ ныффыст æрмæджыты æмбырдгонды фыццаг том «Солнце бытия». Хаст æм æрцыдысты, уырыссагау цы рæнхъытæ ныффыста, уыдонæй кæцыдæр хай.
Энверы царды фæндаг у цæмæдисаг æмæ алы хуызы цаутæй хъæздыг. Кæд фыссæджы дæсныйад йæ сæйрагдæр нæ уыд, уæддæр, рæстæджы цыдимæ йæ уды дидинагау гом кæнгæйæ цыд. Афтæмæй йæ сисы бынæй цы чингуытæ рацыд, уыдон дзæвгар сты. Фæлæ ацы чиныгæн та йæ зæрдæйы ис уæлдай бынат. Авторы ныхæстæм гæсгæ, чиныг ныффыссыны хъуыды фæзынд йæ чызгмæ.
Снывонд йæ кодта йæ кæстæр æфсымæры рухс номыл. Бахаста йæм йæ ног æмдзæвгæтæ, æмбисæндтæ, сæ фылдæр дзурæг сты Хохойты Энверы уарзондзинадыл йæ фыдыбæстæмæ, мадæлон æвзагыл аудындзинадыл. Чиныджы презентаци арæзт æрцыд Дзæуджыхъæуы фæсивæдон библиотекæйы. Ног æмбырдгонды тыххæй сæ хъуыдытæ загътой, фысджытæ, сфæлдыстадон кусджытæ.
Мадзалы рæстæг ма Энверæн лæвæрд æрцыд республикæйы сæргълæууæг Сергей Меняйлойы номæй кады грамотæ. Сæмбæлын ыл æй кодта Ирыстоны фысджыты цæдисы сæрдары хæдивæг Цомартаты Изæтбег. Хорзæхгонд ма æрцыд Кавказы фысджыты клубы майданæй дæр.
Энверы сфæлдыстадон авналæнтæ сты бирæвæрсыг. Зæрдиагæй тæлмац кæны Лев Толстойы, Иван Тургеневы, Иоганн Гете, Владимир Высоцкийы фыстытæ. Публицист фæнд кæны йæ куыстытæ æхсæз томæй рауадзын. Ныр та уал сæ иу хаст æрцыд дзыллæты цурмæ.
