Хъæбатырæй фæмард сæрмагонд æфсæддон операцийы зонæйы
Камбилеевскæйы байгом кодтой номарæн фæйнæг хистæр прапорщик Бететы Таймуразæн. Хъæбатырæй фæмард сæрмагонд æфсæддон операцийы зонæйы. Таймураз уыд æртыккаг оперативон ротæйы инструктор. 2022-æм азы февралæй фæстæмæ архайдта Украинæйы территорийы сæрмагонд æфсæддон хæстæ æххæст кæныны хъуыддаджы. Ивгъуыд азы 22-æм апрелы Уæрæсейы гæрзифтонг позицитыл уыд знаджы ныббырст. Уырдæм æвæстиатæй æртыккаг оперативон ротæйы хыгъды атырныдта Бететы Таймураз дæр. Тохы бацæугæйæ, хистæр прапорщик йæхиуыл нæ ауæрдгæйæ, хъахъхъæдта йæ бæрны службæгæнджыты. Афтæмæй баурæдтой знаджы ныббырст. Фæлæ, хъыгагæн, уыцы тохы райста уæззау цæфтæ. Йе фсæддон хæс æххæст кæнгæйæ, лæгдзинад æмæ хъæбатырдзинад кæй равдыста, уый тыххæй Таймуразæн, йæ амæлæты фæстæ, лæвæрд æрцыд «Лæгдзинады» орден. Номарæн фæйнæг байгом кæныны мадзалы архайдтой хъæбатыры бинонтæ, йæ ахуыргæнджытæ, йе фсæддон æмбæлттæ æмæ хъæуккæгтæ.
