Организацийы хыгъды ныртæккæ ис, дауны синдромимæ сывæллæттæ кæм хъомыл кæнынц, ахæм 150 бинонтæ
Хурдзаст сывæллæттæ. Афтæ хонынц Дауны синдромимæ сабиты. Æмæ цæмæ, уый дæр æмбæрстгонд у. Ацы сывæллæттæн кæд се нæниздзинад зæрдæйы фæндон нæу, уæддæр æппынæдзух сты худындзаст æмæ зæрдæхæлар. Арæх вæййы афтæ, æмæ ныййарджытæ сабийы диагнозы тыххæй нæ фæдзурынц, фæтæрсынц æхсæнады цæстæнгасæй. Уыцы рæстæг та, сабиты социализаци æмæ реабилитаци цудгæ фæкæны. Фæлæ рæстæджы цыдимæ ивынц адæймаджы æууæлтæ дæр. Республикæйы 6 азы размæ фæзынд организаци «Время перемен». Йæ куысты тыххæй йын бæстондæр радзурдзæн Касаты Наирæ.
Фидараты Яринæ куыд зары – мацæмæй тæрс, афтæ йæхæдæг дæр зындзинæдтæ нæхынцгæйæ, тырны размæ. Музыкæ зæрдæйæ уарзы. Чызг йе фсымæр æмæ йæ хоимæ цæуы вокалмæ.
Ноджыдæр ма Яринæ цæуы ирон кафджытæм, аивадон студимæ, æрмдæсныйады къордмæ, стæй ма æнтыстджынæй фæархайы модæты скъолайы равдыстыты. Чызг ахуыр кæны 26-æм иумæйагахуырадон скъолайы. Ахуыр кæны зæрдæргъæвдæй. Ис ын хæлæрттæ.
Хъотайты Альбинæ у организаци «Время перемен»-ы бындурæвæрæг. Фæзынд 6 азы размæ. Уæд дауны синдромимæ сывæллæтты ныййарджытæ баиу сты, æмæ сæ тыхтæ баиу кодтой сабиты социализацийы, æмæ ныййарджытæн ныфсы хос раттыны тыххæй. Уымæй дарддæр ма бамбарын кæнын – кæд дауыны синдром хуымæтæг диагноз нæу, уæддæр йемæ цæрæн ис.
Организацийы архайджыты лыггæнинаг фарстатыл кусгæйæ, Альбинæ сахуыр кодта логопед-дефектологыл æмæ нейропсихологыл. Ныр йæхæдæг дæр хъуыддагыл æвдисы, сывæллæтты сахуыр кæнæн кæй ис, уый.
Цæхгæр лæууы, 18 азы кæуыл сæххæст, ахæм фæсивæды реабилитацийы фарста. Сывæллæтты реабилитацион центры сæ нал исынц, хистæртæм та сын нырма раджы у. Æрæджы фембæлд уыди фæллойы æмæ социалон рæзты министр Айдарты Алинæимæ. Ныхас цыди, цæмæй æрыгон фæлтæрæн фадат уа, инвалидты боныгон центры сæ рæстæг æрвитынæн. Афтæмæй, иу фарста лыггонд æрцæуид.
Дзеранты Еленæ у «Время перемен»-ы архайæг. Йæ фырт куы райгуырди, уæд йæ блогы ныффыста, Хуыцау ын цы кæстæр радта, уый цыфæндыйæ дæр зæрдиагæй кæй исы. Æмæ бузныг у, ахæм тых æм кæй разынд, æмæ цæмæн æмæ цæй тыххæй фæрстытæ кæй нæ дæтты. Дзеранты бинонты ноггуырд куы фæзынд, уæд ыл хъуыды дæр нæ кодтой, хъысмæтимæ сразы сты, æмæ хæдзары фæзынд ног цард, зæгъы Еленæ. Ныр Давидыл цæуы 9 мæйы. Йæ ныййарджыты зæрдæтæ рухс кæны, ногæй исты куы базоны, уæд.
Организаци «Время перемен»-ы хыгъды ныртæккæ ис, дауны синдромимæ сывæллæттæ кæм хъомыл кæнынц, ахæм 150 бинонтæ. Арæх фæархайынц сæрмагонд мадзæлтты, цæуынц алыхуызон къордтæм. Уæвгæ, республикæйы даунимæ синдромимæ адæм кæй зæгъын æй хъæуы ис фылдæр. Фæлæ бирæ ныййарджытæ тæрсынц æхсæнады цæстæнгасæй, æмæ уымæн, раст зæгъгæйæ, аххосæгтæ дæр ис. Уыцы рæстæг та се ппæт ныййардджытæм дæр ис иу бæллиц.
