Сæ куыстытæ йæм бахастой нæ республикæйы æмæ сыхаг регионты 40 æрмдæсныйæ фылдæр
Цæгат Ирыстоны нывгæнджыты Цæдисы равдыстадон залы байгом аивадон куклаты экспозици. Сæ куыстытæ йæм бахастой нæ республикæйы æмæ сыхаг регионты 40 æрмдæсныйæ фылдæр. Цымыдисаг равдысты фенæн ис алыхуызон аргъæутты персонажты: принцессæ, эльф, уæдæ адæмон аргъæутты хъайтартæ дæр парахатæй. Куыстытæ конд сты алы техникæты, стæй алыхуызон æрмæгæй: хъуымац, гæххæтт, æлыг æмæ афтæ дарддæр. Ам ма фенæн ис зындгонд мультфильмты æмæ Нарты кадджыты хъайтарты дæр. Экспозицийы æдæппæтæй ис 150 ирд сурæты, æмæ сæ алкæцы дæр у хицæн ныхасы аккаг. Уымæн æмæ иу иннæйы хуызæн нæу. Сæйраг домæн – национ стиль. Равдысты ахсджиагдæр хæс у – куклаты мастерты аивад парахат кæнын, æмæ йæ райрæзтыл кусын. Экспозици кусддзæн ацы мæйы кæронмæ.
