Арæзтадон куыстытæ бабæрæг кодта Дзæуджыхъуы администрацийы сæргълæууæг Милдзыхты Вячеслав
Фæлладуадзæн фæз æви дукани? Дзусты Ибрагимы уынджы бирæфатерон хæдзары цæрджытæ хъаст кæнынц, ног бæстыхайы арæзтадон куыстытæй. Куыд зæгъынц, афтæмæй закъонмæ гæсгæ бæстыхай хъуамæ уа хæдзарæй 30 метры дарддæр. Арæзтадон куыстытæ бабæрæг кодта Дзæуджыхъуы администрацийы сæргълæууæг Милдзыхты Вячеслав. Бæлвырддæр хабæрттæ радзурдзæн Тъехты Элинæ.
Улæфæн фæзы бæсты – дыууæуæладзыгон дукани. Дзусты Ибрагимы æмæ Весеннийы уынгты тигъыл цы цъæх фæз уыд, уый бынаты фæзынд ног бæстыхай. Хæстæгдæр хæдзары цæрæг Дзалаты Снежанæ йæ сыхæгтимæ арæзтадон куыстытæй разы нæу. Сылгоймаг куыд зæгъы, афтæмæй ацы бынаты раздæр сывæллæттæ цингæнгæйæ хъазыдысты, ныр та сын уыцы фадат нал ис.
Арæзтадон куыстыты рæстæг хæдзары цæрджытæм электрон тыхтæ нал хæццæ кодтой. Уæдæ маршруткæты æрлæууæн бынатæй хæдзармæ цы цыбыр фæндаг уыд, уый дæр сæхгæдта бæстыхай. Куыстытæ райдыдтой февралы. Хæдзары цæрджытæ куыд зæгъынц, афтæмæй бæстыхайы фæзындимæ сæ царды уавæртæ фæзындæр сты.
Бæстыхайы хицау ныридæгæн акалдта, хæдзары цæрджытæ сæхæдæг цы бæлæстæ ныссагътой, уыдон. Уымæй уæлдай ма ног арæзтад хæдзары фыццаг дыууæ уæладзыджы цæрджытæн сæхгæндзæн сæ рудзгуытæ æмæ сын нал уыдзæн уынгмæ ракæсыны фадат.
Цæрджытæ нæ федтой бæстыхайы паспорт дæр. Зонынц æрмæстдæр, дукани 360 квадратон метры кæй у, уый. Арæзтадон куыстыты хицау фембæлд хæдзары цæрджытимæ.
Хæдзары цæрджытæ сæ курдиат бахастой прокуратурæмæ, эпидемиологи æмæ гигиенæйы цæнтрмæ, фæлхасадмæ цæстдарды управленимæ, стæй Дзæуджыхъæуы администрацимæ дæр. Дзуапп сын радтой, æмæ зæрдæ бавæрдтой. Фæлæ дзы ныридæгæн ног бæлæсты бæсты ис æрмæстдæр арæзтадон куыстытæ. Къуыримæ дзы фæзынд бæстыхайы фыццаг уæладзыг. Арæзтады бынат бабæрæг кодта Дзæуджыхъæуы администрацийы сæргълæууæг Милдзыхты Вячеслав. Фембæлд хæдзары цæрджытимæ дæр, æмæ сын бамбарын кодта, ацы бынаты арæзтадон куыстытæ закъонмæ гæсгæ кæнæн кæй нæй, уый. Бацархайдзысты, цæмæй фарста аиуварс кæной, ууыл.
Хæдзары цæрджытæ администрацийы сæргълæууæгæн радзырдтой сæ кæрты æндæр лыггæнинаг фарстаты тæххæй дæр. Зæгъæм, сывæллæтты хъазæн бынат рæстæгæй – рæстæгмæ байдзаг вæййы канализацийы донæй. Уымæй уæлдай ма сæ кæрты нæй бадæн бынæттæ дæр. Милдзыхты Вячеслав зæрдæ бавæрдта, фарстатæ сабыргай лыггонд кæй æрцæудзысты, уымæй.
