Нæ республикæйы цæрджытæн хатгай маршрутон такситæй цæуын свæййы фæлварæны хуызæн
Æхсæнадон транспорты шофыртæ бæлцæтты куыд æфхæрынц, уый фенæн ис тынг арæх. Нæ республикæйы цæрджытæн хатгай маршрутон такситæй цæуын свæййы фæлварæны хуызæн. Бæлцæтты курдиаттæ кæдæм хæсгæ сты, уый тыххæй радзурдзæн Тъехты Элинæ.
Дзæуджыхъæуæй Дзуарыхъæумæ фæндаг Хозиты Дзерассæйæн йæхицæн, стæй йæ хо æмæ йæ мадæн сси тыхæвзарæны хуызæн. Бæлццæттæй иу шофыры æрлæууын кодта, цæмæй йе мбал дæр сбада, уый тыххæй. Диссагæй дзы ницы ис, фæлæ ног бæлццонмæ фенхъæлмæ кастысты æнæхъæн 18 минуты.
Хъæугæ оргæнтæм курдиат бадæттын Дзерассæйæн йæ бон не сси, уымæн æмæ æхсæнадон транспорты фыст нæ уыд транспортон компанийы номыр. Домæнтæм гæсгæ та канд номыр нæ, фæлæ ма дзы фæндаггаджы аргъ дæр фыст хъуамæ уой. Уыцы фæтк чи нæ ххæст кæна, ууыл æвæрд æрцæудзæн административон бæрнондзинад.
Уыцы номырæй спайда кæнын хъæуы, уымæн æмæ аххосæгтæ гыццыл не сты.
Хъаст бахæссæн ис фæлхасадмæ цæстдарды управленимæ. Фæлæ специалисттæ куыд зæгъынц, афтæмæй, Хицауады уынаффæмæ гæсгæ 2030-æм азмæ нæй бæрæггæнæн куыстытæ кæнын астæуккаг æмæ чысыл бизнесы архайджытæн.
Фæндаггон инфраструктурæ æмæ транспорты комитеты кусы автомобилон транспорты хайады телефон – 53-73-84. Адæмæн сæ курдиатимæ сæ бон бадзурын у ацы номырмæ.
Фæлхасадмæ цæстдарды управленийы куыд зæгъынц, афтæмæй æхсæнадон транспорты шофыр бæлццоны куы бафхæра, уæд йæ бон курдиат ныффысын у мидхъуыддæгты министрадмæ.
