Кæй фæндыд, уыдонæн се ппæтæн дæр фадат уыд акцийы архайынæн æмæ йæ зонындзинæдтæ бафæлварынæн
Дзæуджыхъæуы ацыд æппæтадæмон рухстауæн акци «Тоталон диктант». Кæй фæндыд, уыдонæн се ппæтæн дæр фадат уыд акцийы архайынæн æмæ йæ зонындзинæдтæ бафæлварынæн. Диктант фыстой ЦИПУ-йы æмæ республикæйы гуманитарон æмæ социалон иртæстыты институты. Университеты Юнескойы залы текст фыстой 200 адæймаджы. Касти йæ уырыссаг æвзаджы кафедрæйы профессор Борис Кунавин. Диктанты текст баст у уырыссаг фыссæг, Дард Скæсæны иртасæг Владимир Арсеньевимæ. Университеты уырыссаг æвзаджы факультеты ахуыргæнджытæ æмæ студенттæ, стæй Дзæуджыхъæуы æндæр филологтæ ныридæгæн райдыдтой текстытæ бæрæг кæнын. Алкæцымæ дæр дзы каст цæуы дыууæ хатты, иттæг хорз бæрæггæнæнты аккаг чи сты, уыдонмæ та кæсынц æртæ хатты. Тоталон диктанты бæрæггæнæнтæ ныммыхуыр кæндзысты 12-æм апрелы фæстæ . Зæгъын хъæуы уый, æмæ бæрæггæнæн базондзæн æрмæстдæр чи йæ фыста, уый йæхæдæг. Уый тыххæй хъуамæ ныммыхуыр кæна код.
