Се хсæн: æфсæддон парад Дзæуджыхъæуы æмæ Мæздæджы, акци «Бакæс сын сæ цæсгæмттæм», «Æнæмæлгæ полк», стæй ма цалдæр патриотон мадзалы республикæйы æппæт районты
Цæгат Ирыстон Уæлахизы бон сбæрæг кæндзæн цалдæр ахсджиаг мадазалæй. Се хсæн: æфсæддон парад Дзæуджыхъæуы æмæ Мæздæджы, акци «Бакæс сын сæ цæсгæмттæм», «Æнæмæлгæ полк», стæй ма цалдæр патриотон мадзалы республикæйы æппæт районты. 9-æм маймæ цæттæгæнæн куыстыл ныхас цыд организацион комитет «Уæлахиз»-ы. Амыдта йæ республикæйы Сæргълæууæг Сергей Меняйло. Куыд загъта, афтæмæй Стыр Уæлахизы 78 азы бон хъуамæ сбæрæг кæнæм иттæг хорз. Æнæхъæн бæстæйæн дæр у ахсджиаг бон. Уæдæ Цæгат Ирыстонæн дæр афтæ. Не мзæххонтæй 100 мин адæймаджы ацыдысты сæ райгуырæн зæхх бахъахъхъæнынмæ. Уыдонæй сæ фыдыуæзæгыл нал сæмбæлдысты 47 мин адæймаджы. Ацы аз Уæлахизы бон бæрæггонд цæудзæн хицæн уавæрты, ома сæрмагонд æфсæддон операцийы рæстæг. Уый та дзурæг у ууыл, æмæ хъуамæ равдисæм иудзинад, патриотизм æмæ нæ иумæйаг историйы ахадындзинад. Сæйрагдæр у ветерантыл аудындзинад, æмæ сæ размæ æппæт хæстæ æххæст кæнын. Хицауады сæрдары хæдивæг Тугъанаты Ларисæ та организацион комитеты уæнгтæн бæстондæр радзырдта цæттæгæнæн мадзæлтты тыххæй. Нысантæм гæсгæ арæзт æрцæудзæн бæрæгбоны концерт, салют, мото æмæ автомобильтыл дугъ хæстон намысы бынæттыл. Уымæй дарддæр, социалон нысаниуæг кæмæн ис, ахæм культурон æмæ рухстауæн проекттæ, æппæтуæрæсеон æмæ республикон акцитæ: «Георгийы лент», «Сад памяти», лæгдзинады уроктæ æмæ спартакиадæтæ. Уæлахизы Парады Дзæуджыхъæуы архайдзысты Уæрæсейы хъахъхъæнынады Министрады æмæ æндæр тыхы структурæты минæвæрттæ. Уый тыххæй фехъусын кодта 58-æм æфсады командæгæнæджы хæстæ æххæстгæнæг Алексей Ткачев. 9-æм майы агъоммæ ма бæстон базилын хъæуы æппæт цыртдзæвæнтæм æмæ хæстон ингæнтæм.
