Дзæуджыхъæуы хистæр кары адæмæн лæггæдты боныгон центр кæдæй кусы, уæдæй хъуыстгонд у йæ коллективы адæмуарзондзинадæй æмæ дæсны куыстæй
Зæрдиагæй цы куыст кæнай, уымæн, кæд уайтагъд нæ, уæддæр рæстæджы цыдимæ аргъгонд æрцæуы. Дзæуджыхъæуы хистæр кары адæмæн лæггæдты боныгон центр кæдæй кусы, уæдæй хъуыстгонд у йæ коллективы адæмуарзондзинадæй æмæ дæсны куыстæй. Йæ уавæрты кой нын ракæндзæн Сосранты Жаннæ.
Доййаты Тамарæ тынг зæрдиагæй феххуыс кæны хистæр кары адæмы боныгон центрмæ æрбацæуджытæн. Фæлтæрдджын дохтыр æдзухдæр цæттæ у хъæугæ амынддзинæдтæ радтынмæ.
Центры разамынд рæстæгимæ æмдзу кæны. Архайы нырыккон медицинон аппарæттæ амал кæныныл. Ардæм цы адæм цæуы, уыдоны ныхæстæм гæсгæ сæ пайда гуырысхойаг нæу. Доййаты Тамарæ куыд загъта, афтæмæй ма короновирусæй чи хъæрзыд, уыдоны æнæниздзинад фæхуыздæр кæнынæн пайдайаг ма у массаж, уый дæр не вгъау кæнынц уагдонмæ цæргуытæн.
Медицицинон лæггæдтæй, уæлдай ма центры цы лæггæдтæ кæнынц, уыдон сты 40 –мæ хæстæг. Алкæцыйыл дæр сæ дзуапп дæтты, йæ дæсныйадмæ куыд фæндыйыцæстæй чи нæ кæсы, ахæм адæймаг.
Центрмæ æрбацæуын зын нæу. Лæвар дзы сæ бон æрвитын у алы кары пенсиисджытæн, инвæлидтæн. Гаглойты Венерæ ардæм æрбацæуы, æрмæст процедурæтæ скæнынмæ нæ, фæлæ райдзаст æнкъарæнтæ райсынмæ.
Центры арæзт фæцæуы хи ирхæфсæн мадзæлттæ дæр. Ардæм арæх æрбахонынц театралон къордты, æмæ артистты. Дзæуджыхъæуы хистæр кары адæм боныгон сæ рæстæг кæм æрвитынц, уыцы центры кусджытæ, зæрдиагæй фенхъæлмæ кæсынц лæггæдтæ исджытæм. Пандемияйы рæстæг, сæ куыст кæд къуылымпытæ баййæфта, уæддæр йæ архайд нæ баурæдта. Цыдысты йæм, 65- азæй къаддæр кæуыл цæуы, ахæмтæ. Æдæппæтæй та дзы бынат ис æртын адæймагæн. Центры разамынды ныхæстæм гæсгæ зæрдиагæй æнхъæлмæ кæсынц , сæ бон фенцондæр кæнын кæй фæнды уыдонмæ, стæй короновирусæй рынчын чи уыд, уыдонæн бахуыс кæндзысты низы фæстиуджытæ аиуварс кæнынмæ.
