Цы фиппаинæгтæ рабæрæг кæнынц, уыдоны тыххæй информаци арвитынц профилон ведомствæтæм
Адæмон фронты минæвæрттæ та радон хатт сбæлвырд кодтой Дзæуджыхъæуы фæндæгты уавæр. Пырх асфальт æмæ люктæ, дыхъхъытæ. Цавæрдæр уынгты уæвгæ дæр ацæуæн нæй. Æхсæнадон архайджытæ цæрджыты курдиæттæм гæсгæ саразынц мониторингтæ. Бæлвырддæр хабæрттæ радзурдзæн Хъайтмазты Дзерассæ.
Трассоваяйы уынджы хæдзæртты цæрджытæ цыма цивилизацийæ хицæн сты, афтæ. Иуырдыгæй – быдыр, иннæрдыгæй – пырх фæндаг, дзыхъхъытæ, нæй къахвæндæгтæ æмæ рухс. Шофыртæн ацы хайыл ацæуын у фæлтæрæн боныгон дæр, фистæгцæуджытæн та тæссаг у изæрыгон.
Шофыртæ хъаст кæнынц, арф дзыхъхъыты тыххæй машинæтæ хæлынц, уæлдайдæр та къæвдаты рæстæг. Иувæрсты ацæуыны алы фæлварæн дæр сæвзæрын кæны тæссаг уавæр. Бирæтæн та сæ хæдзарæй куыстмæ ацæуын ис æрмæст ацы фæндагыл.
Автомобилисттæ хъаст кæнынц Гвардейскийы æмæ Минины уынгтæ кæм баиу сты, уыцы фæндаджы хайы уæлцъары уавæрæй дæр. Адæмон фронты минæвæрттæ ам рабæрæг кодтой къуылымпыдзинæдтæ. Фиппаинæгтæ ис Тельманы уынджы дæр. Уæлæмхасæн зындзинæдтæ ацы фæндагыл æвзæрын кæнынц люктæ.
Тæссаг ацæуын у, Владивостокскийы æмæ кироваг курсантты уынгтæ кæм баиу вæййынц, уыцы хайыл дæр. Машинæ хæлдтытæй бахъахъхъæныны тыххæй, арæх бахъæуы фембæлæг рæнхъмæ рацæуын. Фыдбылыз ма руадзын баххуыс кæны æрмæст шофырты кæрæдзиæмбарынад.
Адæмон фронты минæвæрттæ ахæм мадзæлттæ фæаразынц æдзухдæр. Цы фиппаинæгтæ рабæрæг кæнынц, уыдоны тыххæй информаци арвитынц профилон ведомствæтæм.
