Республикæйы алы районтæй 7 минæвары равдыстой сæ дæсныйад
Октябрьскæйы арæзт æрцыд ирон чъириты фестиваль-конкурс. Республикæйы алы районтæй 7 минæвары равдыстой сæ дæсныйад. Уымæй уæлдай ма, фестивалы программæ æххæст кæнгæйæ, уыд ирон традицион хойрæгты, национ уæлæдарæсы æмæ музыкалон инструментты равдыст. Фæсивæдæн фадат уыд нæ фыдæлты æрвылбоны фæрæзтæ фенынæн. Цавæр æнкъарæнтæ сæм равзæрд, уый тыххæй радзурдзæн Тъехты Элинæ.
Куывды фæстæ райдыдта бæрæгбон. Октябрьскæйы культурæйы хæдзары дуармæ кафынц сывæллæттæ, æфсинтæ цæттæ кæнынц сæ пецтæ. Бæрæгбон та у хæрзаддæр чъиритæ аразыны фестиваль – конкурс.
Сывæллæттæ цымыдисæй кæсынц хистæрты змæлдмæ. Куырд арæхстджынæй архайы дзæбугимæ æмæ кæстæрты цур аразы хъаматæ. Культурæйы хæдзары хъомылгæнинæгтæ та адæмы ахуыр кæнынц ирон кæлмæрзæнтæ бийын. Республикæйы районтæй 7 минæвары ерыс кæнынц Ирыстоны сакралон хойраг хæрзаддæр чи скæндзæн, ууыл. Æмæ кæд чъиритæ бакастæй иухуызон сты, уæддæр алы фсинæн дæр къæбæр кæнгæйæ ис йæхи сусæгдзинад. Уымæй уæлдай фестивалы хæринаггæнджытæ нæ архайынц. Зæгъæм, Хæлиты Ларисæ Елхоты культурæйы хæдзары амоны цыллæ хызтæ бийын. Фæлæ йæ бафæндыд конкурсы архайын.
Бæрæгбон сарæзтой æххуысгæнджыты руаджы. Равдыстæн ирон адæмы æрвылбоны царды фæрæзты экспонаттæ сæмбырд кодтой иумæйагæй, культурæйы хæдзары кусджытæ та уазджыты базонгæ кодтой нæ адæмы традицитимæ.
Мæхъиты Хадизæйы хъæппæрисы руаджы Горæтгæрон районы цæрджытæн фадат уыд нæ рагфыдæлты цардыуаг фенынæн. Уый та, кæй зæгъын æй хъæуы, у хорз хъуыды.
