Дзæуджыхъæуы вагзалы бæлцæттыл традицимæ гæсгæ æхсызгонæй сæмбæлдысты æртæ чъириимæ
Цæгат Ирыстонмæ фыццаг хатт ссыд туристон поезд «Жемчужина Кавказа». Дзæуджыхъæуы вагзалы бæлцæттыл традицимæ гæсгæ æхсызгонæй сæмбæлдысты æртæ чъириимæ. Уазджытæн акафыдысты национ «Симд». Къуыримæ поезд бабæрæг кæндзæн 6 регионы – Адыгейы, Цæгат Ирыстоны, Дагестаны, Кæсæг-Балхъары, Цæцæны æмæ Мæхъæлы республикæтæ. «Жемчужина Кавказа» йæ балц райдыдта Мæскуыйы Хъазайнаг вагзалæй 2-æм майы. Йæ фæтк афтæ арæзт у, цæмæй туристтæн фадат уа, алы регионы дæр æнæхъæн бон экскурситы цæуынæн, æхсæвыуат та поезды бакæнынæн. Цæгат Ирыстоны разамынды хæслæвæрдмæ гæсгæ, туризмы комитет бакуыста, цæмæй нæ республикæ проекты архайа. Майæ сентябры онг поезд Цæгат Ирыстон бабæрæг кæндзæн 12 хатты. Алы хатт дæр дзы уыдзæн 240 бæлццоны онг.
