Мадзалы архайджытæ, фыццаджыдæр, бабæрæг кодтой Беслæн
Республикæйы райдыдта кадетон хæлардзинады фыццаг фестиваль «Нæ тых – иудзинады». Расидт æй Уæрæсейы хъахъхъæнынады министрад. Мадзалы архайджытæ, фыццаджыдæр, бабæрæг кодтой Беслæн. Фыццæгæм скъолайы сыл сæмбæлдысты, 2004-æм азы теракт йæхиуыл чи бавзæрста, уыдон. Уазджытæн радзырдтой уыцы цауты тыххæй. Уый фæстæ фестивалы архайджытæ бахызтысты спортивон залмæ, сæвæрдтой дидинджытæ, æмæ æдзæмæй алæууыдысты теракты амæттæгты хуызистыты цур. Мадзаларазджытæ куыд загътой, афтæмæй сæ хæсыл банымадтой, фестиваль номарæн акцийæ райдайын, уымæн æмæ уыцы цаутæн рох кæнæн нæй.
Фестивалы архайджытæ бабæрæг кодтой мемориалон уæлмæрд «Зæдты горæт» дæр. Сарæзтой митинг терроризмы ныхмæ. Арвмæ суагътой урс шартæ. Афтæмæй æрхъуыды кодтой теракты амæттæгты рухс нæмттæ. Дидинджытæ сæвæрдтой Хъыджы бæласы, стæй скъола уæгъдгæнгæйæ цы æфсæддонтæ фæмард, уыдоны цыртдзæвæны цур. Фестиваль ахæсдзæн 9-æм июньмæ. Архайдзæн дзы 280 адæймаджы онг – кадетон, суворовон æмæ Нахимовы номыл училищæты ахуырдзаутæ æппæт бæстæйæ. Мадзалы уазджыты хсæн уыдзысты инæлар-лейтенант Халиловы номыл мæскуыйаг музыкалон училищæйы хъомылгæнинæгтæ дæр.
