Уыдон бафысгæйæ, адæмы цард зынгæ ивы
Цæгат Ирыстоны парахат кæнынц социалон контракттæ. Уыдон бафысгæйæ, адæмы цард зынгæ ивы. Уымæн æмæ паддзахадон æххуыс у ахадгæ хи хъуыддаг байгом кæнынæн. Ацы аз нысан кæнынц 1243 социалон контракты бафыссын. Ныридæгæн ахæм фадатæй спайда кодтой 722 адæймаджы. Æмтгæй райсгæйæ, æххуыс райстой 160 милуан сомæн. Фылдæр цавæр къабæзтæ равзарынц амалхъом адæм, уый тыххæй радзурдзæн нæ уацхæссæг Тъехты Элинæ.
Елойты Мæдинæ быйын æмæ хуыйын базыдта йæ нанайы руаджы. Ныр сылгоймагæн уыцы куыст канд хи ирхæфсæн фæрæз нæ, фæлæ бизнес у. Мæдинæ аразы хъазæнтæ, хуыйы хуыссæн цъæрттæ. Цæмæй йæ куыст фæуæрæхдæр кæна, уый тыххæй бирæсывæллонджын ныййарæг бафыста социалон контракт. Рахай йын кодтой 350 мин сомы. Уыцы фæрæзтæй балхæдта хъæугæ кусæнгæрзтæ.
Хъазæнтæ иууылдæр сты фæлмæн æмæ æдас. Мæдинæйæн йæ куыстæн аргъ скодтой канд нæ республикæйы нæ, фæлæ бæстæйы æндæр горæтты цæрджытæ дæр.
Пъамидортæм зилынæй Бицъоты Ритæ нæ фæллайы. Бирæ цы хъармуатмæ æнхъæлмæ каст, уымæ кæсын 5 сывæллоны мад нæ зивæг кæны. Сæрыстырæй æргом кæны йæ куысты сусæгдзинæдтæ.
Хъармуат скæныны бæллиц Ритæйæн сæххæст 2 азы размæ. Цæмæй сырæза, уый тыххæй йæ бахъуыд 250 мин сомы.
Георгий Джавахашвили цалцæг кæны машинæтæ. Куыд зæгъы, афтæмæй хæдтулгæтæ рагæй уарзы. Социалон контракты руаджы райдыдта кусын. Цы фæрæзтæ йын рахай кодтой, уыдонæй балхæдта хъæугæ кусæнгæрзтæ. 3 районæн ай у иунæг машинæтæ цалцæггæнæн бынат.
Георгий æнæзивæгæй экскурси кæны йæ фидæны куыстуатыл. Уæлдай бузныг æмæ сæрыстыр та у йæ сывæллæттæй. Лаурæ йæ хистæр фсымæримæ æххуыс кæнынц Георгийæн.
Социалон контракттæ æххуысхъуаг бинонтимæ фыссын райдыдтой 2021-æм азы. Уыцы рæстæгмæ æххуыс райстой 3 мины æмæ 5 сæдæ адæймагæй фылдæр. Фæрæзты бæрц сбæрæг кæны ведомствæты хсæн къамис.
Ацы аз бафысдзысты 1243 социалон контракты. Ныридæгæн паддзахадон æххуысæй спайда кодтой 722 адæймаджы. Радих сын кодтой 160 милуан сомы.
