Спектаклы архайдзысты Мариинаг театры æмæ æвзонг зарæггæнджыты академийы солисттæ, стæй оперæ æмæ балеты хор
22-æм æмæ 23-æм июлы оперæ æмæ балеты театры премьерон равдыст уыдзæн Вердийы оперæ «Трубадур»-æн. 12 азы фæстæ оперон шедевр æрæздæхт Ирыстонмæ. Дзæуджыхъæуы сценæйы «Трубадур» фыццаг хатт айзæлдзæн италиаг æвзагыл. Спектаклы архайдзысты Мариинаг театры æмæ æвзонг зарæггæнджыты академийы солисттæ, стæй оперæ æмæ балеты хор. Цы æнхъæлмæ кæсы аивадуарзджытæм, уый тыххæй радзурдзæн нæ уацхæссæг Тъехты Элинæ.
Уарзондзинады тæваг æвдыст цæуы алы минуты дæр. Граф ди Луна æмæ трубадур Манрико тох кæнынц Леонорæйы уарзондзинадыл. Кæд сюжет зæронд у, уæддæр Вердийы алæмæты музыкæ зонгæ мелдодрамæ аразы æнкъарæнджындæр. Дзæуджыхъæуы сценæйы оперæ «Трубадур» фыццаг хатт сæвæрдтой 2011-æм азы. Режиссер ын уыд Уæрæсейы адæмон артисткæ Гергиты Ларисæ. Æмæ та 12 азы фæстæ равдыст æрæздæхт Ирыстонмæ ног режиссерон æмæ аивадон уылæнтимæ – фыццаг хатт айзæлдзæн италиаг æвзагыл.
Спектаклы архайынц æрмæст Мариинаг театры æмæ æвзонг зарæггæнджыты академийы солисттæ нæ, фæлæ оперæ æмæ балеты театры хор дæр. Сты 60 адæймагæй фылдæр. Астæуккаг æнусы тар галуаны декорацитæ скодта Черчесты Нинæ.
Оперæйы æнæмæг хъæуынц сопрано, меццо – сопрано, тенор æмæ баритон. «Трубадур»-ы чи зары, уыцы артистмæ хъуамæ уа гениалон авторы æмвæзады курдиат æмæ арæхстдзинад.
«Трубадур»-æн йæ фыццаг равдыст уыд Римы. Кæд уæдæй нырмæ рацыд 150 азæй фылдæр, уæддæр ацы оперæ у бæстæйы парахатдæртæй иу. Астæуккаг æнусы галуантæ, цыгайнаг табортæ, ахæстоны бадæг адæмты хсæн тох арæхстджынæй иу кæнынц Испанийы астæуккаг æнусы темæтæ æмæ авторы хъуыды. Оперæмæ бакæсæн уыдзæн 22-æм æмæ 23-æм июлы. Ахæм цымыдисаг равдыстæй сæхгæндзысты театры сезон.
