Фæндаггон фыдбылызтæ фæфылдæр сты, уымæн æмæ сырæзт транспорты хыгъд
Ивгъуыд 6 мæймæ нæ республикæйы рабæрæг 98 мин закъонхæлдæй фылдæр. Фæндаггон фыдбылызтæ фæфылдæр сты, уымæн æмæ сырæзт транспорты хыгъд. Уый та баст у туристон сезонимæ. Цæмæй хъуыддаг фæхуыздæр уа, уый тыххæй паддзахадон автоинспекцийы минæвæрттæ алы къуыри аразынц профилактикон мадзæлттæ æмæ рейдтæ. Фидæны та фæндаггон камерæтæм бафтаудзысты 20. Бæлвырддæр хабæрттæ радзурдзæн нæ уацхæссæг Тъехты Элинæ.
Фæстаг рæстæг нæ республикæйы фæфылдæр сты фæндаггон фыдбылызтæ. Ацы азы фыццаг æмбисмæ, фаронимæ абаргæйæ, фæфылдæр сты 40 проценты. Уыимæ 30 проценты та фæфылдæр, фæндаггон фыдбылызты чи фæмард, уыдоны хыгъд. Уый тыххæй фехъусын кодтой нæ республикæйы фæндæгтыл æдасæй цæуыны паддзахадон инспекцийæ. Хъуыддаг сраст кæныны тыххæй фылдæр арæзт цæуынц профилактикон мадзæлттæ æмæ рейдтæ.
Рейдтæ æмæ æндæр профилактикон мадзæлттæ арæзт цæуынц алы къуыри дæр. Ивгъуыд 6 мæймæ рабæрæг 98 мин закъонхæлдæй фылдæр. Уæдæ профилактикон фембæлдтытæ аразынц республикæйы ахуырадон бæстыхæйтты дæр. Паддзахадон автоинспекцийы минæвæрттæ æмбарын кæнынц, фæндаггон домæнтæ куыд æххæст кæнын хъæуы, уый.
Нæ республикæйы фæндаггон фыдбылызтæ фæфылдæр сты, уымæн æмæ сырæзт транспорты хыгъд дæр. Уый та баст у туристон сезонимæ. Уæдæ арæх уыд афтæ, æмæ бирæ рæстæг машинæ цы шофыр тæры, уый – иу фæндагыл бафынæй. Паддзахадон автоинспектортæ зæгъынц – шофыр уæвгæйæ кæд бафæлладтæ, уæд уал бауром, æмæ дæ фæллад суадз, цæмæй фæндаггон фыдбылызмæ ма расайа, уый тыххæй.
Стæй ма паддзахадон автоинспекцийы минæвæрттæ зæгъынц – Хъæуы къæрцхъæус уæвын. Машинæ тæргæйæ хъуыды кæнын хъæуы æрмæст дæхиул нæ, фæлæ фистæгæй цæуджытыл дæр. Ацы азы кæронмæ ма фæнд кæнынц фæндаггон камерæтæм бафтауын 20. Уыдон та рабæрæг кæндзысты, шофыр тагъд цæуы, æви нæ, стæй йæхиуыл æдас рон кæй бакодта, уый дæр.
