Уый у æфсæддон намысы символ
Цæгат Ирыстоны арæзт æрцыдысты «фæныкхуыз берет» райсыны фæлварæнтæ. Уый у æфсæддон намысы символ. Ахæм ерыстæ афæдз 8 хатты вæййынц. Сæ архайджыты нæ республикæ фыццаг хатт суазæг кодта. Йæ тыхтæ чи бавзæрста æмæ цавæр æнтыстдзинæдтæ бафтыд сæ къухы, уый тыххæй радзурдзыстæм нæ программæйы дарддæры æрмæджы.
Фæныкхуыз береттæ дарыны бар райсыны фæлварæнтæ æцæг æфсæддон уавæртæм хæстæг сты. Уый у хæстон намысы символ. «Фæныкхуыз беретты» отряды хыгъдмæ бацæуын æнцон нæу. Фæлæ Уалыты Роберты зындзинæдтæ нæ тæрсын кæнынц. Ахæм тестыты архайыны фæлтæрддзинад æм ис. Куыд зæгъы, афтæмæй, фыццаджыдæр, йæхи æвзары.
Квалификацион фæлварæнтæ сæххæст кодтой Уæрæсейы тыхы структурæты сæрмагонд дæлхайæдты кусджытæ. Тох кодтой 2-аг æмæ 3-аг къæпхæны береттыл. Нормативтæ лæвæрдтой 24 сахаты дæргъы. 3-аг къæпхæнмæ хаудысты цæлхдуртимæ фæлтæр, хæстон уавæрты тæссаг цаутæ, бæстыхайы штурм, дзырдгонд ныхмæлæууæгæн ныхкъуырд радтын, ахуыргæнæн спаррингтæ. 2-аг къæпхæн райсынæн та архайджытæ æвдыстой сæ арæхстдзинад æхсæвыгон æхсынæй. Отряд «К-9»-ы æфсæддонтæ сты универсалон инструктортæ. Хæстон цауты бирæ хæттыты архайдтой. Сæ цæстдардæй ахуырад исынц фидæны сгарджытæ, десантниктæ æмæ æфсæддон денджызонтæ. Иу ныхасæй, бæстæйы сæрмагонд нысаниуæг кæмæн ис, æппæт уыцы дæлхайæдтæ.
Ахæм ерыстæ афæдз 8 хатты арæзт æрцæуынц. Цæгат Ирыстоны «фæныкхуыз берет» райсыны фæлварæнтæ фыццаг хатт уыдысты. Бацæттæ сæ кодтой, Уæрæсейы «К-9»-ы тыхы структурæты æмæ «Кремль-9»-ы æдасдзинады оргæнты специалистты сæрмагонд цæттæдзинады федераци республикæйы тæрхондæтты пъырыстыфты службæимæ иумæ.
Цъæх, сырх, кæрдæгхуыз, фæныкхуыз – уыдон сты тыхы структурæты кусджыты иттæг хорз архайды нысанты чысыл хай. Уæрæсейы æфсады хæстон беретты хуызты гаммæ парахат у. Уыцы худтæ дарынц хуыздæртæй хуыздæртæ. Тестыты хатдзæгтæм гæсгæ «Фæныкхуыз беретты» рæнхъытæм бацыд 9 адæймаджы
