Сæ бон сæ у равзарын комкоммæ æххуысы хуызы – уырдæм хауынц лæвар хостæ, санаторитæм балцæгтæ æмæ фæндаггаджы аргъ, кæнæ та сæ исдзысты æхцайæ
Фыццæгæм октябрьмæ хъуамæ цæгатирыстойнаг льготниктæ равзарой, 2024-æм азы социалон лæггæдтæ цы хуызы исдзысты, уый. Сæ бон сæ у равзарын комкоммæ æххуысы хуызы – уырдæм хауынц лæвар хостæ, санаторитæм балцæгтæ æмæ фæндаггаджы аргъ, кæнæ та сæ исдзысты æхцайæ. Пенсион фонды цæгатирыстойнаг хайад куыд хъусын кæны, афтæмæй кæд федералон льготникы фæнды лæггæдты хуыз аивын, уæд æй курдиат бадæттын хъæуы паддзахадон лæггæдты порталы кæнæ та ведомствæйы сайты уылты. Льготæ раздæры хуызы исын кæй фæнды, уыдоны курдиат фыссын нæ хъæуы. Ныртæккæ нæ республикæйы цæрджытæн сæ фылдæр льготæтæ исынц æхцайæ. Фиддоны бæрц у 1469 сомы. Ведомствæ адæмы зæрдыл лæууын кæны – ацы аз фæуæрæхдæр кодтой, льготæтæм гæсгæ лæвар цы хостæ дæттынц, уыдоны номхыгъд. Æдæппæтæй нæ республикæйы федералон льготниктыл банымадтой 94 мины æмæ 300 адæймаджы онг.
