Нырæй фæстæмæ дзы фадат уыдзæн фылдæр дзæгъæл цæрæгойтæн баххуыс кæнынæн
Сæ бынат ссардтой… Дзæуджыхъæуы питомникы фæзынд 150 ног вольеры. Нырæй фæстæмæ дзы фадат уыдзæн фылдæр дзæгъæл цæрæгойтæн баххуыс кæнынæн.
Не сфæлдыстадон къорды нын Дзæуджыхъæуы питомникы куыйтæ суазæг кодтой сæ рæйдæй. Алы цæрæгойæн дæр ис йæхи истори. Чидæр æнæхæдзар уыд, кæйдæр та æрбаластой сæ хицæуттæ. Ныр ацы куыйтæ сты иу бинонты хуызæн. Уæдæ раттынц ног фæлтæр дæр. Алкæмæн дæр дзы ис бынат. Уымæн æмæ ацы аз питомникы сарæзтой фылдæр вольертæ.
Ныридæгæн бæстыхай цæттæ кæнынц эксплуатацимæ. Уымæн бирæ рæстæг нæ бахъæудзæн – æрмæстдæр мæй. Уæдæ вольертимæ йæ дуæрттæ байгом кæндзæн ног корпус дæр. Уым дардзысты лæппынты. Фæззæджы æмæ зымæджы къæбылатæ хъарм бынаты уыдзысты. Ацы бæстыхайы цур ис хицæн ветеринарон блок. Ам дзæбæх æмæ стерилизаци кæнынц куыйты. Æмæ æнæ ацы бæстыхайæ сæ куыст зындæр уыдаид. Уымæн æмæ ардæм рынчын куыйтæ арæх æрбаласынц. Æмæ алкæмæ дæр фæхъæуы бæстон æркæсын.
Питомникы ис æрмæстдæр иу фельдшер. Светлана Алимовайы бахъæуы ветеринары хæстæ дæр æххæст кæнын. Сæйраг лыггæнинаг фарста баст у, куысджытæ кæй нæ фаг кæнынц, уыимæ. Хъæуы фылдæр специалисттæ. Æмæ гæнæн куы нал вæййы, уæд æххуысмæ æрбацæуынц волонтертæ.
Ног вольертæ æмæ æндæр бæстыхæйттæ ис, фæлæ специалисттæ та нæ фаг кæнынц. Æмæ дзæгъæл цæрæгойтæ дарæн бынаты директор куыд зæгъы, афтæмæй уый у сæйраг фарста.
Зæрдæхæлар адæммæ ам æнхъæлмæ кæсынц куыд куыйтæ, афтæ кусджытæ дæр. Зæрдæ дарынц, фарста тагъд рæстæджы лыггонд кæй æрцæудзæн, ууыл. Æмæ уæд ардæм цæудзысты, цæмæй цыппаркъахонтæй фервæзой, уый тыххæй нæ, фæлæ хорз æмбæлттæ ссарынмæ.
