Схъæлæс кодтой 22 мин адæймагæй фылдæр
Сæйраг æвзарæн къамисы хатдзæгтæ скодтой бынæттон хиуынаффæйады оргæнтæм æвзæрстытæн. Схъæлæс кодтой 22 мин адæймагæй фылдæр. Уæ зæрдыл уын лæууын кæнæм, Цæгат Ирыстоны æвзæрстытæ уыдысты 5 районы – Алагиры, Кировы, Æрæфы, Горæтгæроны æмæ Рахизфарсы. Æппæтæй фылдæр схъæлæс кодтой Комсомольскæйы – 95 процентæй фылдæр. Æппæтæй стырдæр кампани уыд Æрæфы районы – минæвæртты æмбырды депутатты æвзарынæй. Æдæппæтæй та уыд 20 æвзарæн кампанийы. Æвзæрстыты архайдта 5 политикон партийы. Хатдзæгтæм гæсгæ, 113 мандаты райстой 4 партийы – «Иугонд Уæрæсе», Уæрæсейы Федерацийы Коммунистон парти, «Родина» æмæ «Справедливая Россия – Патриоты – За правду», 3 мандаты та ма райстой йæ кандидатурæ йæхи хъæппæрисæй чи бахаста, уыдон. 10 хъæуы сæргълæуджытæй æхсæзы равзæрстой ногæй. Сæйраг æвзарæн къамисы куыд загътой, афтæмæй 2 бонмæ закъонхæлдтытæ æмæ хъæстытæ нæ уыд.
