Уыдзысты дзы республикæты культурæйы министрадты, физкультурæ æмæ спорты минæвæрттæ, стæй сфæлдыстадон къордтæ
Цæгат Ирыстоны делегаци архайдзæн Уæрæсейы хуссарварс цæрæг адæмы культурæ æмæ спорты 14-æм фестивалы. Уыдзысты дзы республикæты культурæйы министрадты, физкультурæ æмæ спорты минæвæрттæ, стæй сфæлдыстадон къордтæ. Фестивалы сæйраг хæс – спорты национ хуызтæ æмæ традицион культурæ бахъахъхъæнын, стæй адæмы ахастдзинæдты райрæзтыл кусын. Мадзал цæудзæн Стъараполы крайы, 15-æмæй 18-æм сентябрмæ. Цæгат Ирыстоны минæвæрттæ архайдзысты аивады дæсныдæр кусджыты æппæтадæмон фестиваль «Мир Кавказу»-йы. Уый та райдайдзæн 14-æм сентябры, Черкесскы. Нæ республикæйы кад дзы хъахъхъæндзæн камерон хор «Алани».
Цæгат Ирыстоны æрдзон æвæрæнты æмæ экологийы министрад куыд хъусын кæны, афтæмæй æрæджы республикæйы фæдзæхст бынæтты кæй ауагътой, уыцы леопард Леойы амардтой.
Ацы сырдты хуыз хаст æрцыди сырх чиныгмæ. Кавказы территорийы леопардтæм цæстдарды наукон къорды минæвæртты хъуыдымæ гæсгæ, хъæддаг сырд æнæнхъæлæджы мард не рцыд, фæлæ йæ фехстой комкоммæ, барæй. Хъуыддаг равзарыны курдиат æвæстиатæй лæвæрд æрцыди слестгæнджытæм. Кæд раззагазиаг леопарды браканьертæ кæй амардтой, уый бæлвырдгонд æрцæуа, уæд фыдгæнджытæм æнхъæлмæ кæсы уголовон бæрнондзинад. Уæ зæрдыл уын æй лæууын кæнæм, Лео, Хостæ æмæ Лаурæйы Турмоны фæдзæхст бынæтты ауагътой фарон.
