Ам ветерантæн, сæрмагонд æфсæддон операцийы архайджытæн, стæй сæ бинонтæн фадат ис бирæвæрсыг æххуыс райсынæн
Дзæуджыхъæуы кусы сæрмагонд æфсæддон операцийы архайджытæн æххуыс кæныны паддзахадон фонды филиал «Фыдыбæстæ хъахъхъæнджытæ». Сарæзтой йæ УФ-йы Президенты хъæппæрисæй. Ам ветерантæн, сæрмагонд æфсæддон операцийы архайджытæн, стæй сæ бинонтæн фадат ис бирæвæрсыг æххуыс райсынæн. Куыд цæуы фонды куыст, уый тыххæй бæлвырддæр радзурдзæн Тъехты Элинæ.
Гаситы Алыксандр йе мбæлттæй фехъуыста фонд «Фыдыбæстæ хъахъхъæнджыты» тыххæй, æмæ йæ курдиатимæ уырдæм бацыд. Сæрмагонд æфсæддон операцийы архайгæйæ нæлгоймагæн йе нæниздзинад бонæй – бонмæ æвзæрдæр кодта. Йæ къæхты рыстыл ахуыр у. Фæндаггон фыдбылызы фæстæ йын дзы сæвæрдтой спицæтæ. Александры йæ æфсæддон æмбæлтты æмрæнхъ æрлæууыны размæ банфæндыд йе нæниздзинадмæ базилын. Куыд зæгъы, афтæмæй Райгуырæн Бæстæ хъахъхъæнгæйæ адæймагмæ хъуамæ уа хорз цæттæдзинад.
Уæдæ æххуыс бахъуыд батальон «Шторм. Ирыстон»-ы æфсæддон Плиты Аланы дæр. Æфсæддон операцийы уæззау цæф фæци. Фиддонтимæ йын æххуыс кæны фонды социалон координатор. Ныридæгæн Алан йæхи дзæбæх кæны, цæмæй та фæстæмæ ацæуа тохы быдырмæ, уый тыххæй.
Фондмæ æрбацæуынц канд æфсæддонтæ нæ, фæлæ сæ хæстæджытæ дæр. Социалон кординатортæ сты, сæрмагонд æфсæддон операцийы архайæг æфсæддонты æххуысгæнджытæ. Дзасохты Фатимæ фонды кусы, куы йæ байгом кодтой, уæдæй нырмæ. Сылгоймаг зоны, æфсæддонтæн æмæ сæ бинонтæн куыд зын вæййы, уый. Уымæн æмæ йæ бинойнаг дæр у æфсæддон, архайдта амынæты уæвæг адæмы фервæзын кæныныл.
Фонды кусынц 25 социалон координаторы. Аудынц, сæ бæрны цы адæм ис, уыдоныл. Уæдæ координатортæ ис рсепубликæйы районты дæр. Уый руаджы æххуысхъуаг адæмæн афойнадыл ис фæахъаз кæнын.
Æфсæддонтæн æххуыс кæнын хъæуы æрмæст хæсты быдыры нæ, фæлæ æрвылбоны царды дæр. Фондмæ сæ курдиат бадæттын у ветерантæн, сæ бинонтæн, стæй цæф чи фæци, уыцы æфсæддонтæн дæр. Бонмæ фондмæ бадзурынц 30 адæймаджы онг. 4 мæймæ æххуыс райстой мин адæймагæй фылдæр.
