Нæ республикæмæ ссыдысты программæ «Стыр гстрольтæ» æххæстгæнгæйæ
Дзæуджыхъæуы цæуынц Волгограды паддзахадон академион эксперименталон театры гастрольтæ. Нæ республикæмæ ссыдысты программæ «Стыр гстрольтæ» æххæстгæнгæйæ. Майы та Волгоградмæ абалц кодтой Ирон театры актертæ. Уазджытæ Цæгат Ирыстонмæ сластой æртæ спектаклы – «Вий», «Боинг-Боинг» æмæ «Стакан воды». Не сфæлдыстадон къорд фыццæгтимæ федта спектакль «Вий», бæлвырддæр Сосранты Жаннæ.
Гоголы уацау «Вий»-йæ Волгограды Ног эксперименталон театр байгом кодта йæ Стыр гастрольтæ Дзæуджыхъæуы. Сæйраг ролы дзы хъазы Максим Чекашкин. Артисты фенæн ис Ирыстон цы æртæ спектаклы æрбаластой уыдонæй, алкæцыйы дæр. Максимæн тæккæ зындæр у,– зонгæ сурæт адæмы цурмæ рахæссын афтæ, цæмæй схъаза ног ахорæнтæй.
Сценæйы, артистты хсæн «Вий»-йы хъайтартæй иуы сурæты – театры сæйраг режиссер. Андрей Курицыны цæстæнгасæй таурæгъ у хъæлдзæг комеди. Спектакль сæвæрдта афтæ, цæмæй ма йыл хъæуа ахъуыды кæнын. Уыцы рæстæджы комулæфт банкъарæн ис уæлæдарæсæй, декорацитæй, абоны бон та – кæфтытæй æмæ музыкæйæ. Спектаклы цыдæй та бамбарæн ис, йæ сæйраг хъуыды кæй у – уд кувæндон кæй у, æмæ йæ сыгъдæгæй дарын кæй хъæуы, уый.
Эксперименталон æмæ классикон драматургийæйы иумæйаг куыстæй хицæн кæны Волгограды театр æмæ йæхимæ æлвасы татрдзаутæ. Сæ репертуары ис 45 спектаклы. Ирдæй дзы æвдыст цæуы фæсарæйнаг классика æмæ уырыссаг драматургийæ.
Дзæуджыхъæуы, Стыр гастрольты рæстæг, æвдыст æрцыд æртæ постановкæйы: «Вий», «Боинг-Боинг» æмæ «Стакан воды». Сæ алкæцыйæн дæр стыр аргъ скодта Ирыстоны театрдзау. Уæвгæ, Стыр гастрольты программæ кусы 2014 азы. Йæ фæрцы Уæрæсейы дард сахарты цæрджытæн бантыст фенын зындгонд постановкæтæ.
