Кадджын мадзал арæзт æрцыд горæты администрацийы
Дзæуджыхъæуы 137 бинонтæ райстой ног фатертæй дæгъæлтæ. Кадджын мадзал арæзт æрцыд горæты администрацийы. Завод «Гран»-ы раздæры æмдзæрæны цæрджыты ног фатертæм раивтой муниципалон адрисон программæ æххæстгæнгæйæ. Ныртæккæ специалисттæ цæттæ кæнынц, цæрæнуæттæ ма кæмæн æмбæлы, уыдоны ног номхыгъдтæ. Бæлвырддæр радзурдзæн Хъайтмазты Дзерассæ.
Хуыбылты Зæлинæйы ныр дæр нæма уырны, йæхи ног цæрæнуаты кæй ис, уый. Бирæ рæстæг бирæсывæллонджын бинонтæ цардысты иу агъуысты. Рæстæгимæ хистæр сывæллæттæ апырх сты, фæлæ цæрæн уавæртæ нæ фæхуыздæр сты. Ныр хæдзары æфсин цин кæны. Баластой ног хъæддзаума æмæ аив кæнынц сæ фатер.
Цæрæнуаты сæйрагдæр бынат Зæлинæйæн æнæмæнг цæлгæнæн у. Æмæ уый диссаг нæу. Сылгоймаг сывæллæтты рæвдауæндоны кусы хæринаггæнæгæй. Пецы раз йæ бон у сахатгай лæууын. Йæ курдиатæн ын аргъ кæнынц æрмæст сабитæ нæ, фæлæ сыхæгтæ дæр. Æмдзæрæны иумæйаг цæлгæнæны Зæлинæ хæринаг се ппæты фаг дæр цæттæ кодта. Ног цæрæнуаты дæр фæнд кæны йе стыр бинонты буц кæнын.
Цалынмæ мад цæттæ кæны, уæдмæ 8-аздзыд Даниил кæны дегустаци. Зæлинæйы хæринæгтæн у сæйраг аргъгæнæг. Ног цæлгæнæнмæ сывæллонмæ йæхи фæндтæ ис.
Ног фатертæй дæгъæлтæ райстой 137 бинонтæ. Уыдон сты, кæлæддзæгтыл кæй банымадтой, ахæм 3 бирæуæладзыгон хæдзæртты цæрджытæ. 10 подъездимæ 5-уæладзыгон хæдзар сарæзтой 10 мæймæ. Адæмæн кадджын уавæры раарфæ кодтой горæты администрацийы. Ныртæккæ специалисттæ цæттæ кæнынц, цæрæнуæттæ ма кæмæн æмбæлы, уыдоны ног номхыгъдтæ.
Адæмы кæлæддзаг цæрæнуæттæй ивыны программæ архайы 2006-æм азæй фæстæмæ. Уыцы рæстæгмæ Дзæуджыхъæуы раивтой 66 кæлæддзаг хæдзары цæрджыты. Ног фатертæ райстой 2 500 адæймагæй фылдæр.
