Актертæ цæттæ кæнынц Этель Лилиан Войничы романы мотивтæм гæсгæ премьерæмæ
Иунæгæй æппæт дунейы ныхмæ. «Овод» -ы ног цард бауаддзысты Цæгат Ирыстоны паддзахадон академион театры. Актертæ цæттæ кæнынц Этель Лилиан Войничы романы мотивтæм гæсгæ премьерæмæ. Зындгонд актерты номхыгъд æмæ æрыгон итайлаг революционер республикæйы театрдзауты зæрдæтæ æнæмæнгæй барухс кæндзысты. Артисттæ алы фæлгонц дæр сæхиуыл куыд барынц, уый йæхи цæстæй федта не сфæлдыстадон къорд дæр.
Сценæйы æрыгон адæймаджы æгæрон æмæ фидар удыхъæды æууæлтæ. Артур æмæ Джема нырма нæ зонынц разæй сæм цы æнхъæлмæ кæсы, уый. Ис æм æфсымæрдзинады, уарзондзинады, уæлахизы æмæ хиуыл фæтых уæвынимæ баст бирæ идейæтæ. Чызджы та, йæ хъуыдытæ ахастой уарзондзинады уылæнтыл. Сæ амонд бирæ нæ ахæсдзæн. Спектаклы гом репетици актертæн у премьерæмæ цæттæ кæныны иу къæпхæн, фæлæ аивадуарзджытæ ныридæгæн æмбарынц спектакль тынг цымыдисаг кæй уыдзæни, уый. Спектаклы режиссер у Эльдар Трамов.
13 азы рацыд, æмæ Артур куыд уындæй, афтæ зæрдæйы ахастæй дæр цæхгæр аивта. Йæ рыст уд æмæ æддаг бакасты зын базонæн у кæддæры æвзонг æмæ цардбæллон лæппуыйы. Риварес – фæлтæрдджын журналист, йæхи цæстæй бирæ цыдæртæ чи федта, æмæ алцыппæт йæхиуыл чи бавзæрста, ахæм адæймаг.
Йæ миддуне дæр афтæ. Риссы. Бирæ зæрдæхудтытæ, мæнгарддзинады фæстæ дæр архайы æууæндыныл. Уалыты Гиви йæ персонажы æнкъары зæрдæйæ.
Спектаклы цы актерты хыгъд ис, уый адæмы зæрдæты гуырын кæны æхсызгон æнкъарæнтæ. Хосонты Фатимæ, Æлбегаты Алан, Кочиты Ацæмæз, Сугъараты Хъазыбег, ЦИПУ-йы сæрмагонд курсы студенттæ. Алчидæр йæхи бынаты. Театрдзаутæ семæ худынц æмæ кæуынц. Уымæн æмæ цард уыцы иу рæстæг у комеди дæр æмæ трагеди дæр.
Уæвгæ, Этель Лилиан Войничы романмæ адæм кæсынц алыхуызон цæстæй. Фæлæ иу хъуыддаг у бæлвырд. Йæ хъайтартæм ын куыд фæндыйы цæстæй ничи кæсы. Ныр та фыссæджы æгæрон курдиат баиу режиссеры æмæ актерты профессионалон æууæлтимæ. Сæ иумæйаг куыстæй цы рауад, уыимæ театрдзаутæ базонгæ уыдзысты ноябры. Ирон театр хоны аивадуарзджыты.
