Цалдæр бонмæ Уырыссаг æмæ Ирон академион театртæ сæхимæ лвасдзысты, аивад чи рæзын кæны, ахæм адæмы
Дзæуджыхъæумæ ссыд нырыккон драматургийы сфæлдыстадон лаборатори. Цалдæр бонмæ Уырыссаг æмæ Ирон академион театртæ сæхимæ лвасдзысты, аивад чи рæзын кæны, ахæм адæмы. Сценикон змæлды æмæ аив дзырды специалистты стыр къорд, сæрмагонд программæ æххæст кæнгæйæ, ахуыртæ аразынц ирыстойнаг æмкусджытæн. 5 бонмæ сараздзысты спектакльты эскизтæ. Уыимæ – театр йæхæдæг кæй равзæрста, уыцы пьесæтæм гæсгæ. Æппæт куыстытæн аргъгæнæг уыдзæн театрдзау. Сфæлдыстадон эксперимент æххæст кæнгæйæ, Евгений Вахтанговы номыл Уырыссаг театры æрыгон режиссертæ сæвæрдзысты дыууæ спектаклы – бритайнаг драматург Том Стоппарды «Отражения, или Истинное», стæй Хорватиаг фыссæг Миро Гавраны уацмыс «Все о женщинах». Фæлварæн спектакльтæ равдисдзысты 23-æм октябры. Сæ феныны фадат уыдзæн алкæмæн дæр. Ахæм тренингтæ фæцæуынц Уæрæсейы алы регионты, культурæйы министрады æмæ Театр Наций-ы æххуысæй.
