Æркастысты Дзæуджыхъæуы фæндæгты уавæрмæ
Адæмон фронты минæвæртттæ сарæзтой радон мониторинг. Æркастысты Дзæуджыхъæуы фæндæгты уавæрмæ. Дзыхъхъытæ тынг хъыгдарынц шофырты. Халынц сын сæ машинæтæ. Уæвгæ, эксперттæ мониторингтæ арæх саразынц. Ацы хатт цы бынæтты уыдысты, уый тыххæй радзурдзæн Тъехты Элинæ.
Кутузовы уынджы цы фæндаг ис, уый сцалцæг кодтой 5 азы размæ. Æмæ кæд бирæ рæстæг нæма рацыд, уæддæр дзы фæзынд дзыхъхъытæ. Æмæ кæнынц бонæй – бон фылдæр. Кæй зæгъын æй хъæуы, уыцы хъуыддаг нæ цæуы бынæттон цæрджыты зæрдæмæ. Уый фæдыл æххуысмæ бацыдысты адæмон фронты минвæрттæм. Регионалон æххæстгæнæн комитеты разамонæг Гæлиты Клим куыд зæгъы, афтæмæй паддзахадон стандарттæм гæсгæ дзыхъхъытæ кæд ис, уæддæр хъуамæ дæргъмæ 60 сантиметрæй, бынмæ та 5 сантиметрæй фылдæр ма уой.
Адæмон фронты эксперттæ сарæзтой радон мониторинг. Алы лыггæнинаг фарста дæр – адæмы курдиат баххуыс кæныны тыххæй. Евгения Гущина куыд зæгъы, афтæмæй Салæтты Викторы уынджы 8 азы размæ баивтой дондзæуæн системæ. Хæтæлтæ бавæрдтой, фæлæ дзы рæстæгæй – рæстæгмæ рахъары дон. Уый аххосæй та схуылыдз вæййы асфальт.
Лыггæнинаг фарстаты ратæдзæн кæд аиуварс кæндзысты, уый бæрæг нæма у. Зонæм æрмæстдæр иу – цалынмæ лыггонд не рцæуа, уæдмæ асфальты дзыхъхъытæ кæндзысты фылдæр. Ахæм хъуыддаг сæвзæрд, Пожарскийы æмæ Гвардейскийы уынгтæ кæм баиу вæййынц, уым дæр. Цалдæр боны шофыртæ хъаст кæнынц, уымæн æмæ хæлынц сæ машинæтæ. Адæмон фронты минæвæрттæ уыдысты Пушкинскийы уынджы дæр. Фæндаг сцалцæг кодтой 2 азы размæ. Фæлæ дзы уæддæр ис бирæ дзыхъхъытæ. Ныридæгæн цалцæггæнæн куыстытæ сты сæ тæмæны. Сæ цæст сæм дарынц адæмон фронты минæвæрттæ.
Æвзæр фæндæгты хыгъд фæкъаддæр. Бирæ рæстæг Ставропольскийы уынг нымад уыд æппæтæй æвзæрдæрыл. Хæлд дзы уыд канализацион системæ дæр. Адæмон фронты эксперттæ æркастысты ног фæндаджы уавæрмæ.
Адæмон фронты минæвæрттæ цы закъонхæлдтытæ раиртæстой, уыдон бадæтдзысты прокуратурæмæ æмæ Дзæуджыхъæуы администрацимæ.
