Нæ горæты уынгты фæзынд æнусы размæ
Трамвай у Дзæуджыхъæуы цæрджыты уарзондæр æхсæнадон транспорты хуыз. Нæ горæты уынгты фæзынд æнусы размæ. Фæлæ ныртæккæ куыстуат Владтрамвай æййафы зындзинæдтæ. Ивгъуыд аз нæм фæзындысты ног трамвайтæ. Дзуапп дæттынц нырыккон домæнтæн. Уыимæ та 28 ног вагонæй линимæ рацыдысты æрмæстдæр 15.
Вагæттæ фæндагмæ хъуамæ рацæуой райсомы 5 сахатыл. Хуры фыццаг тынтæ трамвайы цæлхыты гыбар – гыбуримæ куы баиу вæййынц, уæд дуне дæр райхъал вæййы – зæгъы Самайты Зæирæ. Æнусæй фылдæр истори кæмæн ис, уыцы æхсæнадон транспорты хуызы шофыр у 17 азы. Сигналон жилет æмæ шофыры æвдисæндар кæддæриддæр вæййынц йемæ. Сылгоймаг куыд зæгъы, афтæмæй йæ куысты сæйрагдæр у куыстуарзондзинад. Йæ фæлладуадзæн бонты бакусын дæр зивæг нæ фæкæны. Фæлæ шофыртæ фаг кæй нæй, уый аххосæй йын вæййы зындæр. Уымæн æмæ вæййы афтæ, æмæ сæ бакусын фæхъæуы 12 сахаты æнæрлæугæйæ.
Æдæппæтæй ис 28 ног трамвайы. Уыдонæй кусынц 15. Кусджытæ кæй нæ фаг кæнынц, уыцы фарста рагай сæвзæрд. Муниципалон куыстуат æмбырд кодта ног кусджыты æмæ сæ ахуыр кодта. 6 мæйы бахъуыд теорийæн, практикæты та уыдысты 100 сахаты сæ разамонджытимæ. Ахуырты рæстæг дæр адæмæн фыстой æхца. Трамвайты ног шофырты бацæттæ кæнынмæ арæзт сты æппæт гæнæнтæ. Ис æмдзæрæнтæ дæр, цæмæй дæрддзæф цæрæг адæмæн ахуыры бынатмæ æнцондæр цæуæн уа, уый тыххæй.
Ног трамвайтæ, фæлæ зæронд лыггæнинаг фарстатæ. Дæлстанцæтæ, трамваты фæндæгтæ æмæ афтæ дарддæр. Ног кусæнгæрзтæн хъæуы 12 милуан сомы бæрц. Фæлæ ахæм фæрæзтæ нырма нæй.
Рельсты ивæн куыстытæм æнхъæлмæ кастысты 60 азы онг. Фарон баивтой трамвайты фæндæгты дæсгай километртæ. Зæгъæм, Къостайы проспекты, Байаты Гаппойы, Марковы æмæ Чапаевы уынгты.
Муниципалон куыстуаты директор Бдайциаты Алан куыд зæгъы, афтæмæй фыццаджыдæр хъæуы æркæсын 8 дæлстанцæмæ. Уымæн æмæ æнæ уыдонæй бауромдзæн трамвайты куыст. Æппæт фарстатæм сæ цæст дарынц Дзæуджыхъæуы администрацийы минæвæрттæ. Зæрдæ æвæрынц, алы фарста дæр лыггонд кæй æрцæудзæн, уымæй.
