Мадзал арæзт цæудзæн президент Владимир Путины хъæппæрисæй
Æлыгæй конд миниатюрæтæ, алы æрмæджытæй конд традицион дзаумæттæ, музыкалон инструменттæ. Алцыдæр национ æууæлтимæ. Тагъд рæстæджы Цæгат Ирыстон алы къабæзты æнтыстдзинæдтæ равæрдзæн аппæтадæмон равдыст-форум «Россия»-йы. Мадзал арæзт цæудзæн президент Владимир Путины хъæппæрисæй. Архайдзысты дзы нæ бæстæйы æппæт регионтæ. Цæгат Ирыстон форумы уазджыты дисы цæмæй æфтаудзæн, уый тыххæй радзурдзæн Хъайтмазты Дзерассæ.
Адæмон хæдзарады æнтыстдзинæдты равдысты территорийы кæронмæ фæхæццæ кæны равдыстадон стенды монтаж. Регионы боны Ирыстон форумы архайджыты дисы бафтаудзæн алыхуызон интерактивтæй республикæйы амбассадорты дæсныйадæвдисæг ахуыртимæ. Цæгатирыстойнаг стенды уазджытæн уыдзæн сæхи суанг фехтованийы афæлварыны фадат дæр. Амонгæ та сын кæндзæн фæлтæрдджын ахуыргæнæг, олимпаг чемпионкæ Санаты Аидæ.
Ирыстон у алывæрсыг регион. Туризмы æмæ спорты æнтыстдзинæдтæй фæстæмæ ма зындгонд у йæ хъæздыг культурæйæ. Актер Æгайты Эльберды фæрцы Цæгат Ирыстоны стендæй равдыст-форумы рауайдзæн театралон сценæ. Равдисдзæн моноспектакль цымыдисаг номимæ «Иногда нам снятся старые собаки». Уацмысы автор – Плиты Сослан.
Иудзинады хъуыды бæрæг дары равдысты алы хъуыддаджы дæр. Дæсгай регионтæ суыдзысты иу стыр архайды хай, цæмæй кæрæдзийы хуыздæр базоной æмæ æнгомдæр кæной. Ахæм иудзинады символтæ суыдзысты 90 заз бæласы дæр. Саив кæндзысты форумы территори Ног Азмæ. Республикæйы заз бæлас срæсугъд кæнынæн дизайнертæ равзæрстой сæрмагонд фæлындæнтæ. Цæрæгойты сыкъатæй Ирыстоны пайда кæнынц, куыд традицион национ бæгæныйы къусæй. Æппæтадæмон равдыст-форум «Россия»-йы та суыдзысты фæлындæнтæ.
Цымыдисаг уыдзысты национ уæлæдарæсы куклатæ æмæ керамикæйæ конд дзауматæ дæр. Уыдон дæр саив кæндзысты ног азы бæлас.
Цæгат Ирыстон равæрдзæн йæ экспозици æппæтадæмон равдыст-форум «Россия»-йы. Байгом уыдзæн цалдæр боны фæстæ Адæмон хæдзарады æнтыстдзинæдты равдысты территорийы Мæскуыйы æмæ ахæсдзæн 2024-æм азы апрельмæ. Республикæйы сæйраг хæс у, равдисын ирон адæмы хæдбындурон культурæ, æнусон традицитæ, æмæ уды тых, стæй скæнын алы къабæзты æнтыстдзинæдты презентаци. Уый у наукæ, ахуырад, культурæ, туризм, спорт, хъæууон хæдзарад. Равдисдзысты регионы инвестицион гæнæнтæ. Парахатæй æвдыст æрцæудзысты адæмон-аивадон амалиуæгтæ дæр.
