Хуымæтæг уавæртæй дæр сты цух
Æрæкæсинаг хъуыддаг. Хъайтмазты Фатимæ æмæ Элеонорæ сты æххуысхъуаг. Зын бауырнæн у, фæлæ ныр 20 азæй фылдæр цæрынц æртæ квадратон метрыл. Хуымæтæг уавæртæй дæр сты цух. Сæхи цæрæнуат райсын у сæ ахсджиагдæр бæллиц. Дыууæйæн дæр се нæниздзинад у хъыгдард. Зæрдæхæлар адæм сын бæргæ æххуыс кæнынц, фæлæ уый фаг нæу. Куыд лыггонд цæуы сæ фарста, уый тыххæй радзурдзæн Фидараты Маринæ.
Бирæфатерон хæдзæртты чъылдыммæ, гаражты æмæ машинæтæ ремонтгæнæн боксты хсæн æрбынæттон сты Хъайтмазты бинонтæ. Зын бауырнæн у, 21-æм æнусы мад æмæ чызг ахæм уавæрты цæрынц, уый. Фæлæ сын æндæр гæнæн нæй. Хъайтмазты Фатимæ æмæ йæ чызг Элеонорæ цæрынц æртæ квадратон метрыл. Мад у дыккаг къорды инвалид. Йæ чызг та рынчын у церебралон параличæй. Йæ цардæмбал куы амарди, уæд Фатимæ баззад æнæ æххуысгæнæгæй. Дуканийы куыста уæйгæнæгæй. Уым-иу баззади йæ чызгимæ æхсæвы дæр.
Элеонорæйыл цæуы 30 азы, фæлæ йын 12 азæй фылдæр ничи ратдзæн. Рынчын чызг йæ бонтæ рвиты ацы уаты. Дон сæм нæй, æрбахæссынц æй уынгæй. Рухс дæр, куыд æмбæлы, афтæ нæ, сæ уавæртæ дæр уынджы. Уымæй дарддæр сæ уæлæдарæс къоппыты æвæрд.
Ныртæккæ Фатимæйæн йæ бон кусын нæу, Элеонорæйы иунæгæй куыд ныууадза. Социалон службæтæ ныр 20 азы бæрц кæсынц ацы бинонтæм. Сæ бон куыд у, афтæ сын æххуыс кæнынц. Фæлæ сын цæрæнуаты фарста алыг кæнын не нтысы.
Бирæ азты дæргъы Хъайтмазты Фатимæйæн йæ бон нæу цæрæнуат райсынмæ рады слæууын. Фарстатæ æвзæрыдысты йæ гæххæттытимæ. Фæлæ ныр уавæр ивын райдыдта Ирыстойнаг районы прокуратурæйы фæрцы.
Фатимæ йæ зæрдæ дары, рæхджы йæ чызг хуыздæр уавæрты кæй æрцæрдзæн, ууыл. Тынг зын сын у ныртæккæ. Афтæмæй, кæрæдзийæн ныфсытæ æвæргæйæ, мад æмæ чызг сæ бонтæ рвитынц.
