Райдыдта апрелы, культурон хъæппæристы Президенты фонды æххуысæй, æмæ дзы архайдтой нæ бæстæйы алы регионты минæвæрттæ
Мæскуыйы арæзт æрцыд модæйы æмæ дизайны Æппæтуæрæсеон фестиваль «Зæды бæллицты» финал. Райдыдта апрелы, культурон хъæппæристы Президенты фонды æххуысæй, æмæ дзы архайдтой нæ бæстæйы алы регионты минæвæрттæ. Уыдонимæ – Цæгат Ирыстонæй дæр. Зæгъын ма хъæуы уый дæр, æмæ дзы сæхи бафæлвæрдтой, йе нæниздзинад хъыгдард кæмæн у, ахæм модельтæ дæр. Фестиваль баиу кодта курдиатджын фæсивæды. Цæмæй бафтыдтой дисы, уый тыххæй радзурдзæн Фидараты Маринæ.
«Зæды бæллицтæ» сæххæст уыдзысты. Уымæн радон æвдисæн – модæйы æмæ дизайны æппæтуæрæсеон фестивалы финал. Аорæзт æрцыд Мæскуыйы, ювелирон хæдзар «Эстет»-ы сценæйы. Подиуммæ рацыдысты 60 æвзонг моделы Уæрæсейы алы регионтæй. Уыимæ йе нæниздзинад хъыгдард кæмæн у, ахæм сывæллæттæ дæр. Фæлтæрдджын модельертимæ ма сæ коллекцитæ бацæттæ кодтой райдайгæ дизайнертæ дæр.
Фестиваль «Зæды бæллицтæ» райдыдта апрелы, нæ бæстæйы президенты грантты фонды æххуысæй. Модæйы бæрæгбон суазæг кодта Дзæуджыхъæу дæр. Рæзгæ фæлтæры минæвæрттæ, алы диагнозтимæ фæсивæд равдыстой сæ зонындзинæдтæ æмæ сæ фыццаг фæлварæнтæ. Баххуыс та сын кодтой зæрдæхæлар адæм. Дæнцæгæн æрхæсдзыстæм дунейы æмæ Дзæуджыхъæуы миссис Туаты Тинæ. Ам зæгъын хъæуы уый, æмæ ацы хъуыды царды рауадзын бантыст Маринæ Маркеловайы хъæппæрисæй. У 25 сывæллоны мад. Уыдонæй 18-æн се нæниздзинад у цудыд.
Фестивалы ма архайдтой кавказаг кафты ансамбль «ИрБиС». Йæ разамонджытæ сты Гæлуаты Сергей æмæ Беллæ, бренд TOTAL TACTILITY, йæ дизайнер Таболты Тамарæ, стæй Тават Гаджиевайы бренд TAVAT.FUR. Спонсортæй иу уыд адвокатты коллеги «Ваш юридический поверенный»-йы разамонæг, не мзæххон Константин Трапаидзе. Модæйы къабазы специалисттæ, аивæдты архайджытæ æмæ бизнесментæ баиу сты, цæмæй баххуыс кæной фæкæсынхъуаг сывæллæттæн.
Фестиваль «Зæды бæллицтæ» баиу кодта хъæппæрисджын адæмы. Уый фæрцы сывæллæттæн фадат ис сæ курдиат раргом кæнынæн æмæ пайдайаг зонындзинæдтæ райсынæн. Йе нæниздзинад хъыгдард кæмæн у, ахæм фæсивæд сты уæлдай бæстон цæстдард æмæ æххуысхъуаг. Зæдты бæллицтæ та хъуамæ кæддæриддæр æххæст кæной.
