Горæты питомникы ныртæккæ ис 240 цæрæгойы
Дзæуджыхъæумæ Новосибирскæй ссыдысты, дзæгъæл цæрæгойтæн лæвар стерилизаци чи кæны, ахæм 9 специалисты. Горæты питомникы ныртæккæ ис 240 цæрæгойы. Се ппæтмæ дæр базылдысты, скодтой сын æнæмæнг хъæугæ процедурæтæ. Уæвгæ питомникы кусджытæ сæхæдæг дæр æххæст кæнынц сæ размæ вæрд хæстæ. Фæлæ сын уазджыты фæлтæрддзинадимæ базонгæ уæвын сæ куысты у хорз æххуыс. Цы къуылымпыдзинæдтимæ æмбæлынц, уый раргом кодтой не сфæлдыстадон къордæн. Бæлвырддæр радзурдзæн Касаты Наирæ.
Дзæуджыхъæуы питомникы куыстытæ сты сæ тæмæны. Иутæ барынц куыйты уæз, иннæтæ хостæ цæттæ кæнынц, чидæртæ та операцитæ кæнынц. Новосибирскæй нæ республикæмæ ссыди 9 специалисты, цæмæй цæрæгойтæн лæвар скæной стерилизаци. Фыццаг бон операцитæ скодтой приюты цы куыйтæ ис, уыдонæн, уый фæстæ хæдзары кæй дарынц, уыцы цæрæгойтæн.
Светлана Алимова у раздæры æфсады службæгæнæг, ныр та питомникы ветеринарон фельдшер. Йæ хъæппæрисæй Новосибирскы специалисттæ фыццаг хатт хуынд æрцыдысты нæ республикæмæ. Уазджытимæ иумæ архайынц питомникы кусджытæ дæр – ветеринартæ, фельдшертæ, санитартæ, цæрæгойты чи ахсы, уыдон, стæй волонтертæ. Сæ фæлтæрддзинадимæ се мкусджыты базонгæ кæнын – уый у республикæйы уазджыты сæйраг хæс.
Сæ размæ вæрд хæстæ дзæуджыхъæуккаг питомник æххæст кæны куыд æмбæлы, афтæ. Фæлæ сæм ис æндæр лыггæнинаг фарста. Районты нæй питомниктæ, уымæ гæсгæ хъæуты цы дзæгъæл цæрæгойтæ ис, уыдон сласынц Дзæуджыхъæумæ æмæ сæ ам ауадзынц. Нырма районты питомникты арæзтады хъуыддаг йæ бынатæй не змæлы. Уый хыгъд, фарста алыг кæнæн ис æндæр хуызы. Алы районы центры дæр сæрмагонд агъуыст скæнын, цæмæй дзы цæрæгойтæн кæной стерилизаци. Фæлæ нырма уый дæр нæй. Афтæмæй та, хъуыддагмæ бæрнон цæстæй каст куы æрцæуид, уæд республикæйы дзæгъæл цæрæгойты фарста лыггонд æрцæуид 5 азмæ.
Кæддæр Дзебысаты Стефани питомникмæ æрбахаста куыдз, æмæ ныр бирæ азты æххуыс кæны цæрæгойтæн. Вæййы афтæ æмæ хъуыддагæй ницы фæуайы, фæлæ уæддæр Стефани спайда кæны æппæт гæнæнтæй æмæ цæрæойы аирвæзын кæны.
Æмæ уымæн ис бæлвырд аххоссаг. Ис лæппын куыйты зынтæй кæмæй сдзæбæх вæййынц, ахæм алыхуызон низтæ. Кæд дзы хъомыл куыйтæн тæссаг нæ вæййы, уæддæр къæбылаты приютмæ низ куы æрбахæссынц, уæд дзы эпидеми апарахат вæййы æппæт гыццыл цæрæгойтæ дæр. Къуыригай фæхуыссынц капельницæты бын, хъыгагæн се ппæт нæ аирвæзынц, уæдмæ та æнæрхъуыды адæм ногæй æрбаппарынц ног рынчын къæбылайы – æмæ та хъуыддаг ногæй райдайы.
Ныртæккæ Дзæуджыхъæуы питомникы ис 250 цæрæгойы. Куыйтæ схъомыл уыдзысты ам, уый та ууыл дзурæг у, æмæ сæ уынгмæ ауадзæн нал ис, уымæн æмæ хибарæй нæ фæцæрдзысты. Стыртæ æмæ гыццылтæ, хæрзмыггаг æмæ хуымæтæг, хъæлдзæг æмæ æнкъард, иууылдæр æнхъæлмæ кæсынц сæ хицæуттæм. Афтæмæй бирæ адæм сæхицæн ссардзысты хæлæрттæ. Ацы питомникы та ахæм хæларзæрдæ цæрæгойтæ гыццыл нæй, æрмæст æм хъæуы æрбацæуын.
