Арæх цы тулдз æмæ уисхъæд бæлæстæ фенæм, уыдонæй уæлдай ма нысагътой магнолийы, кипарисы, павловнийы æмæ ликвидаамбарæйы талатæ
Ацы аз фæззæджы Дзæдужыхъæуы ныссагътой бæлæсты 700 талайы. Фæлæ ныридæгæн сезон цæуы дарддæр. Арæх цы тулдз æмæ уисхъæд бæлæстæ фенæм, уыдонæй уæлдай ма нысагътой магнолийы, кипарисы, павловнийы æмæ ликвидаамбарæйы талатæ. Штыбы фæзмæ хæстæг Терчыбыл акалдтой, аварион уавæры цы 5 бæласы уыдысты, уыдон. Сæ бынаты дзы нысагътой магнолийы 15 талайы. 33 та ма нысагътьой Плиты Иссæйы цыртдзæвæнмæ хæстæг. Чысыл раздæр ма уыцы бæласы хуыз нысагътой Сæрибары фæзы æмæ Евгений Вахтанговы номыл аллеймæ хæстæг. Уымæй уæлдай ма 50 талайы фæзындзæн чысыл район «Новый город»-ы дæр – зæгъынц специалисттæ. Фылдæр магноли уый тыххæй садзынц, æмæ у æнцондарæн бæлас, стæй адæмæн йæ рæсугъдзинад лæвар кæнын райдадйдзæн 3-4 азы фæстæ. Уæд райдайдзæн дидинæг калын.
