Мадзалы райдиан уыдзæнис нæ регионы презентаци
Абон Мæскуыйы, æппæтадæмон равдыст-форум «Россия»-йы программæмæ гæсгæ, ацæудзæн Республикæ Цæгат Ирыстон Аланийы бон. Мадзалы райдиан уыдзæнис нæ регионы презентаци. Амондзæн æй республикæйы Сæргълæууæг Сергей Меняйло. Уый радзурдзæн нæ регионы хъомыс æмæ æнтыстдзинæдты тыххæй. Уыцы бон стенды ацæудзысты алыхуызон ахуырадон æмæ культурон мадзæлттæ. Нæ республикæйы бон байгом уыдзæнис 12 сахатыл. Стенды æвдыст цæуынц Ирыстоны культурæ, адæм æмæ традицитæ. Нæ регионы равдыст æрбынат кодта 75 павильоны. Экспозицийы ис цалдæр тематикон блокы, уыдонимæ туризм, спорт, культурæ, фæсивæд æмæ ахуырад, стæй горæты тыгъдад. Уымæй дарддæр уазджытæн уыдзæнис гæнæн нæ республикæмæ туристон балцæгтæ рамбулынæн. Боны дæргъы стенды раз араздзысты дæсныйадæвдисæг ахуыртæ цыллæ кæлмæрзæнтæ аразынæй, зындгонд спортсменты равдыстытæ æмæ æндæр мадзæлттæ. Равдысты уазджытимæ æмбæлдзысты Ирыстоны зындгонд спортсментæ, артисттæ, фысджытæ. Изæры та Сергей Меняйло дзуæппытæ ратдзæнис журналистты фæрстытæн. Абон ма, ирон адæмы æгъдæуттæ хуыздæр æмæ ирддæрæй равдисыны тыххæй форумы рæстæг ирон традицитæм гæсгæ, сæ къайад сфидар кæндзысты æрыгон бинонтæ.
