Сбæлвырд кодтой Дзæуджыхъæуы цалдæр бирæфæтарон хæдзары кæртытæ
Адæмон фронты специалисттæ радон хатт сарæзтой мониторинг. Сбæлвырд кодтой Дзæуджыхъæуы цалдæр бирæфæтарон хæдзары кæртытæ. Адæм хъаст кæнынц – машинæтæн нæ фаг кæнынц æрлæууæн бынæттæ, фæндæгтæ сты базилинаг, фæлладуадзæн зонæтæ та уæвгæ дæр нæй. Бæлвырддæр радзурдзæн Хъайтмазты Дзерассæ.
Фæндæгтыл дзыхъхъытæ, пырх бордюртæ, кæрты нæ фаг кæнынц машинæтæн бынæттæ. Æмæ афтæ ныр цалдæр азы, зæгъы Цæллаты Риммæ. Йæ ныхæстæм гæсгæ, хатгай подъездмæ бацæуæн дæр нæ вæййы. Хæдзары фарсмæ сывæллæтты фæз. Уый дæр рагæй зилинаг у. Гугкайы-фырты уынджы 63-æм хæдзары цæрджыты хъæппæрисадон къорд фæсидт Адæмон фронтмæ. Æхсæнадон архайджытæ уайтагъд бабæрæг кодтой бынат.
Адæмон фронты специалисттæ сбæлвырд кодтой Гастеллойы уынджы дæр иу хай. Бынæттон цæрджыты ныхæстæм гæсгæ, ацы цъæх зонæ районы иунæг у. Адæмы фæнды, цæмæй аивгонд æрцæуа, фæлæ ацы бынаты райдыдтой коммерцион объект аразын.
Адæмон фронты минæвæрттæ аныхас кодтой бынæттон цæрджытимæ. Куыд загътой, афтæмæй адæмы курдиæттæ хыгъд æрцæудзысты æмæ сæ профилон ведомствæтæм æрвитдзысты.
Дзæуджыхъæуы администрацийы бамбарын кодтой, коммерцион объект аразынæн бардæттæг гæххæтт ис.
Ацы хайы цур ныртæккæ аразынц бирæуæладзыгон хæдзар. Цъæх зонæмæ базилынмæ бавналдзысты, арæзтадон куыстытæ куы фæуой, уый фæстæ.
