Адæмон Хæдзарады Æнтыстдзинæдты Равдысты 75-æм павильоны бацæттæ кодтой хъæздыг программæ
Мæскуыйы æппæтадæмон равдыст-форум «Россия»-йы уыд Республикæ Цæгат Ирыстон-Аланийы бон. Адæмон Хæдзарады Æнтыстдзинæдты Равдысты 75-æм павильоны бацæттæ кодтой хъæздыг программæ. Уазджытæн арæзт æрцыдысты дæсныйадæвдисæг ахуыртæ, интерактивтæ, зындгонд спортсментимæ фембæлдтытæ æмæ ма бирæ æндæр цымыдисаг мадзæлттæ. Ирыстоны бон байгом кодта республикæйы Сæргълæууæг Сергей Меняйло. Уый радзырдта нæ регионы хъомысы тыххæй. Цæгатирыстойнаг стендæн аргъ скодта сенатор Мамсыраты Таймураз. Кадджын уазджыты хсæн уыдысты Дзасохты Алыксандр æмæ Битарты Вячеслав. Се ппæт дæр алы рæстæджыты разамынд лæвæрдтой нæ республикæйæн. Уæвгæ, программæ хъæздыг æмæ цымыдисаг. Театрализацигонд æмæ национ костюмты равдыстытæ. Уазджытæн ма бацæттæ кодтой хъазт «Nartiada» 3D графикæимæ. Уый фæрцы адæм зонгæ кодтой Нарты кадджыты историимæ. Уæ зæрдыл уын æрлæууын кæндзыстæм, равдыст-форум Мæскуыйы арæзт æрцыд Уæрæсейы Президенты амындмæ гæсгæ. Нæ бæстæйы регионтæ дзы æвдисынц се нтыстдзинæдтæ экономикæйы – промышленносты, энергетикæйы, агропромышленнон комплексы, транспорты, арæзтады, наукæйы æмæ культурæйы.
