Ацы хъуыддагыл куыст цæуы дыууæ азы онг
Мæздæджы Уæлахизы Парчы цæуынц аивгæнæн куыстытæ. Ацы хъуыддагыл куыст цæуы дыууæ азы онг. Уæвгæ, фæлладуадзæн бынат хъуамæ раджы рацарæзтаиккой, фæлæ хъуыддагыл фæззынди коррупци. Бюджетæй фæрæзтæ дихгонд æрцыди, цыма куыстытæ кæронмæ фесты, ахæм хуызы. Уыцы цæстфæлдахæн митæ рабæрæг сты уголовон слесты рæстæг. Аххосджынтæ æфхæрд æрцыдысты закъонмæ гæсгæ, ног подрядон организаци та хъуыддагыл кусы дарддæр. Не сфæлдыстадон къорд бабæрæг кодта Мæздæджы Уæлахизы Парк. Бæлвырддæр радзурдзæн Касааты Наирæ.
Уæлахизы парк у Мæздæджы се ппæт цæрджыты уарзондæр фæлладуадзæн бынæтæй иу. Ардæм æрбацæуынц æнæхъæн бинонтæй. Фæсивæд дзы фæархайынц спортæй, хистæр кары фæлтæр та сæ рæстæг фервитынц бæлæсты бын тезгъо кæнгæйæ. Дарья НазАренко и Юлия ТекучЕва хæлæрттæ сты ныр дыууын азæй фылдæр. Чызджытæ тынг бацин кодтой, куы йæ базыдтой сæ уарзон парк сын саив кæндзысты, зæгъгæ, уыцы хъусынгæнинагыл.
Куыстытæ дзы райдыдтой 2 азы размæ. Проектмæ гæсгæ дзы хъуамæ æвæрд æрцыдаид ног бандæттæ æмæ рухсгæнæн системæ, брусчаткæ, хъуамæ цъæхфæлыстæй саив кодтаиккой парчы зонæ æмæ базылдаиккой пляжмæ. Фæлæ æппæт уыцы куыстытæ æххæстгонд не рцыдысты. Æдасдзинады федералон службæйы управленийы куыд загътой, афтæмæй уыцы рæстæг Мæздæджы сæргълæууæджы хæстæ чи æххæст кодта, уыцы бæрнон кусæг бюджетæй радих кодта 6 милуанмæ хæстæг, фæлæ куыстытæ æххæстгонд не рцыдысты. Йæхиуыл дæр æмæ подрядон организацийы разамонæгыл дæр сарæзтой уголовон хъуыддæгтæ.
Ныртæккæ горæты бюджетæй бантыст бандæттæ аивын, парчы иу хай саив кæнын, стæй дзы сценæ саразын. Уæлахизы парчы ныр ис гом сценæ. Ныридæгæн дзы концерттæ дæр ацыд. Аивгæнæн куыстытæ дзæвгар фæкъаддæр сты, фæрæзтæ кæй нæ фаг кæны, уый тыххæй. Мæздæджы сæргълæууæг Тугъанаты Иринæ куыд зæгъы, афтæмæй нысан кæнынц федералон грант райсынæн конкурсы архайын.
Уæлахизы Парчы аивгæнæн куыстытæ кæд сног кæндзысты, уый бæрæг нæма у. Адæмы уырны. сæ уарзон фæлладуадзæн бынат сын кæй срæсугъд кæндзысты, æмæ ацы хатт куыстытæ кæронмæ кæй ахæццæ кæдзысты, уый.
