Алы кары æмæ дæсныйæдты минæвæрттæ баиу сты иу фæндонимæ – сæрмагонд æфсæддон операцийы чи архайы, уыцы хæстонтæн баххуыс кæнын
Зæрдæхæлар æмæ бæрнон – ахæмтæ сты æхсæнад «Согрей солдата»-йы волонтертæ. Алы кары æмæ дæсныйæдты минæвæрттæ баиу сты иу фæндонимæ – сæрмагонд æфсæддон операцийы чи архайы, уыцы хæстонтæн баххуыс кæнын. Сæ уæгъд рæстæг волонтертæ цæттæ кæнынц маскировкæгæнæн хызтæ, хæссæнтæ æмæ бирæ æндæр хъæугæ дзаумæттæ. Бæлвырддæр радзурдзæн Хъайтмазты Дзерассæ.
Ацы чысыл цехы стыр куыст цæуы æвæллайгæйæ. Алчидæр фæллой кæны иу хъуыдыимæ: фронтæн баххуыс кæнын æмæ Уæлахиз æрбахæстæг кæнын. Цалынмæ иутæ маскировкæгæнæн хызтæ быйынц, уæдмæ иннæ чызджытæ хуыйынц хæссæнтæ. Хуымæтæг хъуыддаг нæу, фæлæ йæ волонтертæ æнтыстджынæй æххæст кæнынц.
Æмæ ахæм хъæбатырдзинад ис, ацы къорды хай чи сси, æмæ ныртæккæ æххуыс кæй хъæуы, уыцы хæстонтæн йæ уæгъд рæстæг чи не *вгъау кæны, уыдонæй алкæмæдæр. Фыццаг ахæм æхсæнад аразын Людмила Храбрых нæ фæнд кодта. Йæ хæларимæ æмбырд кодта фæрæзтæ æфсæддонтæн генераторæн. Баххуыс кæнын кæй бафæндыд, уыдон бирæ разындысты.
Дохтыртæ, офисты кусджытæ, хæдзары фсинтæ, æмæ ма суанг спорты мастертæ дæр… Алы къабæзтæй адæм баиу сты иу нысанимæ. Хистæртимæ фæллой кæнынц сывæллæттæ дæр. Уыдон ныридæгæн æмбарынц, фронты чи ис, уыцы хæстонтæн ахæм æххуыс куыд ахсджиаг у, уый.
2 метры дæргъæн хæссæнтæй чысыл хызынты онг. Цехы цæттæ кæнынц, фронты хæстонтæн сæ вазыгджын æфсæддон хæстæ æххæст кæнынæн цыдæриддæр баххуыс кæна, уый. Кæмфæндыдæр, цавæрдæр зын уавæры бахаугæйæ, сæ разы вæййы æрмæст хъæугæ дзаума нæ, фæлæ сæ райгуырæн зæхх сæ фарсмæ кæй ис, уый æмбарынад. Материалон æххуысимæ волонтертæ арвитынц чысыл фыстæджытæ дæр – арфæтимæ æмæ бузныджы ныхæстимæ. Æмæ æрмæст уый нæ.
Ахæм цонгдарæнтæ волонтертæ фæцæттæ кæнынц сæ хæдзæртты, хиконд станоктæй пайдагæнгæйæ. Уый та у, адæймаджы баххуыс кæнын куы бафæнда, уæд цавæрфæнды фадат дæр кæй ссардзæн, уый æвдисæн.
Волонтертæ сæрмагонд æфсæддон операцийы архайджыты тыххæй дзургæйæ, иухуызонæй фæнысан кæнынц: «Уым иууылдæр нæхиуæттæ сты». Æмæ æххуыс дæр се *ппæты хъæуы.
Æхсæнады волонтертæ æцæгдæр бахъарм кæнынц нæ хæстонты – се *ххуысæй æмæ аудындзинадæй. Алы дзаумайы дæр бавæрынц сæ зæрдæйы хъарм, цæмæй хæстонтæ банкъарой, сæхимæ сæм куыд тынг æнхъæлмæ кæсынц – удæгасæй æмæ æнæнизæй.
