Бæлвырддæр та дзы, йе нæниздзинад хъыгдард кæмæн у, уыцы адæмæн æмбæлгæ уавæртæ арæзт æрцыдысты, æви нæ, уый
Парти «Иугонд Уæрæсе»-йы минæвæрттæ сбæрæг кодтой ног арæзт хæдзæрттæ. Бæлвырддæр та дзы, йе нæниздзинад хъыгдард кæмæн у, уыцы адæмæн æмбæлгæ уавæртæ арæзт æрцыдысты, æви нæ, уый. Мониторинг арæзт æрцыд, партион проект «Иу бæстæ – æмхуызон уавæртæ» æххæст кæнгæйæ. Бæрæггæнæн куысты архайдтой арæзтады æмæ архитектруæйы министрады минæвæрттæ, стæй республикæйы цæрæнуæтты æмæ архитектурон-арæзтадон цæстдарды паддзахадон службæйы кусджытæ. Бæлвырддæр хабæрттæ радзурдзæн Тъехты Элинæ.
Пандустæ хъæуынц, цæмæй йæ къæхтæ кæмæн нæ кусынц, уыцы адæмæн æнæкъуылымпыйæ фадат уа бæстыхаймæ бацæуынæн. Æмæ хъуамæ арæзт уой сæрмагонд домæнтæм гæсгæ. Уыдонæй иу – пандус хъуамæ бынмæ æркъул уа 7 градусы онг. Фæлæ арæх арæзтадон компани уыцы домæн нæ сæххæст кæны. Парти «Иугонд Уæрæсе»-йы минæвæрттæ æркастысты Магкаты Зурабы уынджы бирæуæладзыгон хæдзæрттæм. Район арæзтой стандартон проектмæ гæсгæ. Хъуамæ дзы уой пандустæ, фæлæ куыд рабæрæг, афтæмæй домæнтæ æххæстгонд не сты. Республикæйы Парламенты депутат Цæллагкаты Жаннæ æркаст, конструкцитæ, се нæниздзинад хъыгдард кæмæн у, уыдонæн куыд лæггад кæнынц, уымæ.
Парти «Иугонд Уæрæсе»-йы минæвæрттæ уымæй дарддæр уыдысты Зæнджиаты Владимиры уынджы дæр. Аргъ кодтой ногарæзт хæдзæрттæн. Ам дæр домæнтæ æххæстгонд не сты. Уымæ гæсгæ инвалидтæн сæ бон æнæххуысæй бæстыхаймæ бацæуын не суыдзæн.
Партийы минæвæрттæ мониторингы рæстæг цы закъонхæлдтытæ раиртæстой, уыдон арвитдзысты хъæугæ ведомствæтæм. Уалдзæджы та ногæй æркæсдзысты, домæнтæ сæххæст кодтой, æви нæ, стæй ног мониторингтæ сараздзысты горæты æндæр районты дæр.
