Мадзал ацыди Дзæуджыхъæуы, æмæ йын разамынд лæвæрдта УФ-йы Президенты æххæстбарджын минæвар Цæгат Кавказы федералон зылды Юрий Чайка
Цæгат Ирыстоны Сæргълæууæг Сергей Меняйло архайдта, сæрмагонд æфсæддон операцийы чи архайы, уыцы æфсæддонтæн æххуыс кæныны фарстаты фæдыл Оперативон штабы æмбырды. Мадзал ацыди Дзæуджыхъæуы, æмæ йын разамынд лæвæрдта УФ-йы Президенты æххæстбарджын минæвар Цæгат Кавказы федералон зылды Юрий Чайка. Æмбырды архайдтой Цæгат Кавказы федералон зылды регионты сæргълæуджытæ æмæ республикæты официалон минæвæрттæ. Юрий Чайка бузныг загъта субъектты разамындæн æмæ се ппæт дзуапдæттæг оргæнты минæвæрттæн 2023-æм азы куысты хатдзæгты тыххæй. Уый фæстæ снысан кодта ацы азæн ног хæстæ. Куыд загъта, афтæмæй фылдæр æргом аздахын хъæуы сæрмагонд æфсæддон операцийы архайджыты æмæ сæ бинонты социалон уавæрмæ.
Реабилитацийы, ветерантæн ног дæсныйæдтæ райсыны, социалон фиддонтæн æмæ алыхуызон льготæтæн гæххæттытæ æрæмбырд кæныны, медицинон, психологон æмæ юридикон лæггæдты исыны фарстатæ хъуамæ æппындæр къуылымпы ма кæной. Ацы хъуыддæгтæм бæрнон цæст дарыны хæс æвæрд ис паддзахадон, регионалон æмæ муниципалон хицаудзинадыл, стæй æхсæнадон организацитыл. Ацы къабазæты куысты бæрæггæнæнтæй ирдæй зындзæн паддзахады цæстæнгас адæммæ, уæлдайдæр та райгуырæн бæстæ хъахъхъæныны сæраппонд чи æрлæууыди, уыдонмæ, загъта бæрнон кусæг.
Æмбырды хатдзæгтæм гæсгæ, дзуапдæттæг оргæнтæн радтой бæлвырд хæстæ, æмæ сæ сæххæст кæнынмæ цæстдард цæудзæн карзæй. Юрий Чайка ма Цæгат Ирыстоны Сæргълæууæг Сергей Меняйлоимæ сарæзта дыууæвæрсыг кусæг фембæлд дæр. Æрдзырдтой дзы субъекты социалон-экономикон æмæ æхсæнадон-политикон фарстатыл, стæй ивгъуыд азы хатдзæгтыл. Сергей Меняйло бæстонæй радзырдта, республикæйы равзæрды 100 азы бæрæг кæнынмæ регион куыд цæттæ кæны, ууыл.
