14 февраля 2024, 11:09
Дзæуджыхъæуы ацыд нæ горæты тъорт саразыны конкурсы дыккаг къæпхæн
Хуыздæр адджинæгтæ аразæджы схорзæхджын кæндзысты сæрмагонд приз – 240 мин сомæй
2023-æм азы кæрон Дзæуджыхъæуы администраци расидти нæ горæты тъорт саразыны конкурс. Сбастой йæ, Дзæуджыхъæуы равзæрдыл 240 азы кæй æххæст кæны, уыцы цауимæ. Конкурсы архайыны фадат ис алкæмæн дæр. Арæзт уыдзæн 3 къæпхæнæй. Ацы бонты ацыд 2-аг къæпхæн. Архайдтой дзы 7 адæймаджы. Жюрийæн равдыстой сæ арæхтдзинад æмæ сарæзтой, тъорт «Дзæуджыхъæу» куыд уынынц, афтæ. Уыцы 7 адæймагæй финалмæ рацыдысты æртæйæ. Хуыздæр адджинæгтæ аразæджы схорзæхджын кæндзысты сæрмагонд приз – 240 мин сомæй. Конкурс сарæзтой Дзæуджыхъæуы администрацийы минæвæрттæ Цæгат Ирыстоны базарадон – экономикон колледжы ххуысæй.
темæмæ гæсгæ
