Ахуыргæнæндон 2011-æм азæй нырмæ хæссы æдасдзинады Федералон службæйы кусæджы ном
Сергей Астанины номарæн бон Луковскæйы скъола архайдта Æппæтуæрæсеон акци «Хъæбатыры партæ»-йы. Ахуыргæнæндон 2011-æм азæй нырмæ хæссы æдасдзинады Федералон службæйы кусæджы ном. Фæмарди йæ хæс æххæстгæнгæйæ. Кадджын мадзал бабæрæг кодта Дзæуджыхъæуæй делегаци дæр. Йæ хыгъды службæйы ветерантæ, ныртæккæйы службæгæнджытæ, бынæттон хицаудзинады оргæнтæ æмæ æхсæнадон организациты минæвæрттæ. Акцийы архайджытæ хъæбатыры æрымысыдысты, минут æдзæмæй алæугæйæ. Уый фæстæ æрхъуыды кодтой, станицæйы цæрджытæй ма лæгдзинад чи равдыста, уыдоны дæр. Проект «Хъæбатыры партæ» баст у йе фсæддон хæс æххæстгæнгæйæ æмæ райгуырæн бæстæ хъахъхъæнгæйæ чи фæмарди, уыдоны рухс номæн кад кæнынимæ. «Хъæбатыры партæ»-йы уæлхъус бадыны бар уыдзæни, йæ ахуыры фылдæр æнтыстдзинæдтæ кæмæн уа, æмæ скъолайы царды активонæй чи архайа, уыцы скъоладзаутæн.
