Уазæгуаты сæ æрбахуыдтой батальон «Шторм. Осетия»-йы хæстонтæ
Цæгат Ирыстон бабæрæг кодтой 5-аздзыд Назар Кабаченко æмæ йæ бинонтæ Запорожьейы облæстæй. Уазæгуаты сæ æрбахуыдтой батальон «Шторм. Осетия»-йы хæстонтæ. Æфсæддонтæ ацы бинонтимæ балымæн сты, Назар та сси се стыр хæлар. Фæсном «Кардан» кæмæн ис, батальоны уыцы хæстоны хуызæн кæй у, уый тыххæй та ма йæ схуыдтой Карданыч. Бæлвырддæр радзурдзæн Хъайтмазты Дзерассæ.
5-аздзыд Назар Кабаченко у батальон «Шторм. Осетия»-йы хæстонты стыр хæлар. Базонгæ сты 6 мæйы размæ, сæрмагонд æфсæддон операцийы архайджытæ Назар кæм цæры, уыцы хъæуы раз позицитæ куы бацахстой, уæд. Батальоны хæстонтæ уайтагъд балымæн сты лæппуимæ, райдыдтой йæ бинонтæн æххуыс кæнын. Йæ мад Марина мысы, алцæмæйдæр-иу сæм фæкастысты – хойрæгтæй, уæлæдарæсæй, сæ бон цæмæй уыд, уымæй.
Батальон «Шторм. Осетия.»-йы хæстонты хуындмæ гæсгæ, Кабаченкоты бинонтæ æрбацыдысты Цæгат Ирыстонмæ. Назарæн ис 2 хистæр æфсымæры – Никита æмæ Юрий. Республикæмæ балц сын сси æхсызгон цау. Уазджытæн равдыстой регионы рæсугъд бынæттæ, базонгæ сты традицитæ æмæ культурæимæ, национ хæринæгтимæ. Марина Кабаченко куыд зæгъы, афтæмæй бинонтæн Цæгат Ирыстоны сæ зæрдæмæ тынг фæцыдис.
Батальоны хæстонтæ радтой Назарæн фæсном «Карданыч», сæрмагонд æфсæддон операцийы архайæг Хъарданты Ацæмæзы хуызæн кæй у, уый тыххæй. Йæхæдæг куыд зæгъы, афтæмæй йын Назар сси хионы хуызæн.
Кардан, ахæм у Ацæмæзы фæсном, дзуры, Назар сæм йæхæдæг кæй æрбацыд зонгæ кæнынмæ, афтæмæй балымæн сты. Уæрæсейы æххуысы фæрцы уæгъдгонд территориты адæмы цард сабыргай хуыздæр кæны. Фæлæ уæддæр, Назары бинонтæн æххуыс кæнын æмæ сæм цæст дарын, батальон йæ хæсыл нымайы, зæгъы Хъарданты Ацæмæз
Назаримæ сæмбæлд республикæйы сæргълæууæг. Сергей Меняйлойы хæслæвæрдмæ гæсгæ, лæппуйæн бахуыдтой æфсæддон формæ. Регионы разамонæг ын раарфæ кодта, æмæ зæрдæ бавæрдта æххуысæй. Ныртæккæ Назар йæ бинонтимæ ацыд сæхимæ. Æмæ йын тæссаг нæу, уымæн æмæ йæ хъахъхъæнынц батальон «Шторм. Осетия»-йы хæстонтæ.
