Республикæйы административон бæстыхæйтты дæлæмæ æруагътой паддзахадон тырысатæ
Куыд æппæт Уæрæсейы, афтæ Цæгат Ирыстоны дæр знон уыд саударæн бон. Республикæйы административон бæстыхæйтты дæлæмæ æруагътой паддзахадон тырысатæ. Рекламон фæйнæджытыл сыгъдысты сойын цырæгътæ. Алцыдæр баст уыд теракты амæттæгты рухс нæмттимæ. Нæ республикæйы цæрджытæ уæлдай хæстæгдæр райстой уыцы рыст сæхимæ. Уымæн æмæ искæйы ныхæстæй нæ зонæм ахæм æврихъау фыдбылызты тыххæй. 2004-æм азы Беслæны цы зæрдæхалæн теракт æрцыд, уыцы бынатмæ цалдæр боны цыдысты адæм, æмæ мысыдысты Красногорскы фыдбылызы амæттæгты. Беслæны Мемориалон фыццæгæм скъолайы ссыгътой цырæгътæ. Афтæмæй равдыстой, хъыгдардбаййафджытæн сæ фарсмæ кæй æрбалæууыдысты, уый. Цæгат Ирыстоны сæргълæууæг дæр сæвæрдта дидинджытæ Беслæны скъолайы. Адæм цыдысты æмæ цыдысты. Цырæгътæ сыгътой суанг æхсæвы онг.