Бæстыхай у историон, арæзт æрцыди советон рæстæг, æмæ нымад у культурон цыртдзæвæныл
Алыхуызон рагон элементтæй аивгонд бæстыхай. Дзæуджыхъæуы бындуронæй цалцæг кæнынц Марковы уынджы бирæфатерон хæдзар. Бæстыхай у историон, арæзт æрцыди советон рæстæг, æмæ нымад у культурон цыртдзæвæныл. Ныридæгæн дзы куыстыты иу хай кæронмæ фæци. Ныртæккæ та специалисттæ зилынц объекты декоративон æууæлтæм. Темæ дарддæр ахæццæ кæндзæн Касаты Наирæ.
Дзæуджыхъæу у бирæвæрсыг, уæлдайдæр та йæ архитектурон æууæлтæй. Адæймаджы цæст уайтагъд æрхæцы революцийы агъоммæйы, стæй Советон Цæдисы рæстæгæй культурон хæзнатыл нымад чи сты, ахæм объекттыл. Марковы уынджы бирæфатерон хæдзæрттæй иу нымад у советон архитектурæйы цыртдзæвæныл.
Бæстыхайы æддаг бакаст уыди базилинаг æмæ йæм бындуронæй бавнæлдтой 2023-æм азы. Куыстытæ æххæстгонд цыдысты республикон программæмæ гæсгæ. Сæ иумæйаг аргъ 22 милуан сомы. Объекты цалцæг рахызт ацы азмæ æмæ кæронмæ фæуыдзæн тагъд рæстæджы.
Бæстыхайы æддаг бакаст цы элементтæй аивгонд у, уыдон сты йæ хицæндзинæдтæ, æмæ сæ æнæмæнгæй хъæуы бахъахъхъæнын. Объекты кусынц 20 адæймаджы. Ацы хæдзар цымыдисаг у æрмæст йæ аив архитектурæйæ нæ, фæлæ ма йæ историйæ дæр. Ам царды республикæйы адæмон артисткæ Кочысаты Розæ. Марковы уынджы хæдзар йæ уникалон хицæндзинæдтæ бахъахъхъæдта. Ам ис æмбал кæмæн нæй, ахæм архитектурон фæзилæнтæ, æнус кæуыл цæуы, ахæм асинтæ, Ленины бюст…
1-æм июнмæ цалцæггæнæн куыстыты сæйраг хай хъуамæ æххæстгонд æрцæуа.
