Иу радмæ йæ бабæрæг кæныны фадат уыдзæн 700 адæймагæн
Терапевтон хайад, сылгоймæгты æмæ сывæллæтты консультацитæ, стоматологон поликлиникæ, амбулаторон хирургийы хайад. Беслæны дарддæр цæуы районы поликлиникæйы рацарæзт. Иу радмæ йæ бабæрæг кæныны фадат уыдзæн 700 адæймагæн. Куыстытæ æххæстгонд цæуынц паддзахадон программæ «Æнæниздзинадхъахъхъæнынады райрæзт»-мæ гæсгæ. Ноггонд медицинон кусæнуатмæ балхæндзысты бæрзондтехнологон ифтонггæрзтæ. Бæлвырддæр радзурдзæн Хъайтмазты Дзерассæ.
Ног цыдæр саразынæн, зæронд хъæуы фехалын. Ахæм стыр куыстытæ ам нæ уыд, поликлиникæйæн бындур æвæрд куы æрцыд, уæдæй фæстæмæ. Бæстыхай уыд кæлæддзаг уавæры. Абон медицинон кусджытæ рæстæгмæ кусынц районы рынчындоны. Рахизфарсы районы дохтыртæн æмæ цæрджытæн поликлиникæйы рацарæзт стыр хъуыддаг у.
Бæстыхайы бындурон цалцæг райдыдта 2022-æм азы мартъийы паддзахадон программæ «Æнæниздзинадхъахъхъæнынады райрæзт»-мæ гæсгæ. Проект æххæст кæнынæн радих кодтой 500 милуан сомæй фылдæр. Ног проект зынгæ хицæн кæны. Райхæлдтой 5-æм уæладзыг æмæ къæсæртæ. Зæронд бæстыхай нырыккон сейсмикон нормæтæн æмæ зынгсирвæзтыты ныхмæ æдасдзинады домæнтæн дзуапп нæ лæвæрдта.
Бæстыхайы проекты хыгъд æрцыдысты металлон фæрæзтæй къултæ фидар кæнын, хъармгæнæн æмæ доны, вентиляцион æмæ кондиционерон системæтæ. Дыккаг къæпхæны куыстытæ куы фæуой, уæд бавналдзысты ахорынмæ æмæ плиткæ æвæрынмæ.
Аивгæнæн куыстытимæ аразджытæ кæнынц бæстыхайы сæры куыст дæр. Пайда кæнынц нырыккон æрмæджытæй æмæ технологитæй. Проектмæ гæсгæ уыдзæн мембраннон сæр. Уый у резинæгонд æрмæг. Нæ уадзы дон, лæггад кæндзæн 50 азы дæргъы æнæ цалцæгæй. Объекты ныридæгæн скодтой хъармгæнæн. Æххæст кæндзæн районы рынчындон, поликлиникæ æмæ тагъд æххуысы бæстыхай. Сæвæрдтой ног трансформаторон дæлстанцæ дæр. Уый æнæрлæугæйæ электрон тыхæй æххæст кæндзæн агъуыстытæ.
Медицинон кусæнуаты уыдзæн терапевтон хайад, сылгоймæгты æмæ сывæллæтты консультацитæ, стоматологон поликлиникæ, амбулаторон хирургийы хайад, сæрмагонд диагностикæ. Объект хъуамæ сцæттæ уа афæдзы кæронмæ.
