Сырх Æфсады дæлбулкъон Дмитрий Ващенко архайдта Фыдыбæстæйы Стыр хæсты ахсджиагдæр тохты
Æцæг лæгдзинады дæнцæг. Сырх Æфсады дæлбулкъон Дмитрий Ващенко архайдта Фыдыбæстæйы Стыр хæсты ахсджиагдæр тохты. Йæ хъæбатырдзинады тыххæй хорзæхджынгонд æрцыд бирæ ордентæй æмæ майдантæй. Дмитрий йæ цардæй ахицæн 30 азы размæ. Фæлæ йæ ном цæры, чи йæ зыдта, æмæ йын кад чи кодта, уыдоны зæрдæты. Бирæ рæстæг Дмитрий Ващенко куыста Цæгат Ирыстоны теле æмæ радиокомитеты. Йæ цардыл афæлгæст нæ уацхæссæг Чехойты Фатимæ.
Сырх æфсады дæлбулкъон Дмитрий Ващенко хæстмæ ацыдис, Саратовы арæнхъахъхъæнджыты училищæйы ахуыр куыддæр фæци, афтæ. Йæ сабийы бонтæй фæстæмæ бæллыди æфсæддон суæвын. Фыдыбæстæйы Стыр хæстæн йæ фыццаг бонтæй уыди хæсты быдыры. Знаджы ныхмæ хæцыди Сталинграды æмæ Кавказы арæнты. Уæды Орджоникидзейы сæмбæлд йæ фидæны цардæмбалыл. Уыимæ бæхæццæ сты суанг Берлинмæ. Хæсты фæстæ Дмитрий Ващенко службæ кодта фæсарæнты.
Лидияйæн йæ фыд у, стыр лæгдзинад чи равдыста, ахæм хъæбатыр. Чызджы ныхæстæм гæсгæ – уый нæ уарзта хæсты тыххæй дзурын, тохы быдыры цаутæ-иу стæм хатт æрымысыди. Уыди рæстдзинадыл хæст. Фæллой кæнын дæр уый сахуыр кодта йæ чызджы.
Ивгъуыд æнусы 60-йæм азты æфсады службæйæ йын фæлладуадзыны рæстæг куы *рцыд, уæд Дмитрий Ващенко кусын райдыдта Цæгат Ирыстоны киностудийы. Уыди хистæр инспектор, куыста хайады разамонæгæй, фæстæдæр та сси киноисæн къорды директор. Æмтгæй райсгæйæ киностудийы фæкуыста 30 азы бæрц. Уыди бирæ кинонывты директор, се *хсæн – документалон кинонывтæ «Ситуация», «Сельские заботы шахтеров», «Свекровь». Йæ *мкусджытæ йæ сæ фыд хуыдтой. Æрмæст хорз специалист нæ уыд, фæлæ ма уыд цæстуарзон зондамонæг.
Хъæбатыры ном рох нæу. Фыст у Дзæуджыхъæумæ бацæуæны, Дзызæлы уæлмæрдтæ кæм сты, уым цы дот ис, ууыл. Арæзт æрцыд 1942 азы Дмитрий Ващенкойы разамындæй. Историон объект бахъахъхъæныныл кусы æппæтуæрæсеон музыкалон-ахуырадон, наукон проект «Россия Юг Победа Помним»-ы къорд. Ващенкойы дотыл ис сæрмагонд gr-код. Чырæ телефоны камерæ йæм куы бахæссай, уæд базонæн ис хæстоны царды хабæрттæ æмæ йæ хъæбатырдзинæдты тыххæй. Ацы дот арæзт æрцыд хæсты рæстæг, иннæтæй уæлдай хъахъхъæд æрцыд, æмæ уый тыххæй у нымад у уникалоныл.
Йæ хъæбатырдзинады тыххæй Дмитрий Ващенко хорзæхджынгонд æрцыд «Сталинград хъахъхъæныны «, «Хæстон сгуыхтдзинæдты», æмæ «Кавказ суæгъд кæныны» тыххæй майдæнтæй, стæй «Сырх стъалыйы» æмæ «Фыдыбæстæйы хæсты 2-аг къæпхæны» ордентæй. Йæ цардвæндаг фæци 1996-æм азы 23 фæвралы, Фыдыбæстæ хъахъхъæнæджы бон.
