Дзанайты Азанбеджы номыл аивадон училищæйы къулыл номарæн фæйнæг байгом кодтой Цæгат Ирыстоны Автономон Советон Социалистон Республикæйы культурæйы министр Ужегаты Солтанæн.
Паддзахадон архайæджы ном хъуыстгонд у куыд нæ республикæйы, афтæ æндæр рæтты дæр. Историйы ахуыргæнæг, культурæйы министр æмæ нæ республикæйы фæсивæдон библиотекæйы разамонæг… Цыфæнды бæрнон бынаты дæр йæ хæстæ æххæст кодта иттæг хорз. Уый иу, иннæмæй та кæддæриддæр æххуыс кодта рæзгæ фæлтæрæн. Йе стырдæр нысаныл нымадта фæсивæды хъомылады рæзтыл кусын. Зæгъын ма хъæуы уый, æмæ Ужегаты Солтаны хъæппæрисæй бындур æвæрд æрцыд аивадон училищæйæн. Абон дæр дзы фæлтæрæй-фæлтæрмæ хæццæ кæнынц, Солтан цы традицитæ ныффидар кодта, уыдон. Мемориалон фæйнæг у аивадон училищæйы дипломон проекттæй иу. Йæ автор у Зæнджиаты Ланæ.
