Советон Цæдисы хъæбатыр 18 азы бæрц командæгæнæг уыди, Цæгат Ирыстоны арæнтæ цы æфсæддонтæ хъахъхъæнынц, уыдонæн
Советон Цæдисы хъæбатыр Вадим Матросов 18 азы бæрц командæгæнæг уыди, Цæгат Ирыстоны арæнтæ цы æфсæддонтæ хъахъхъæнынц, уыдонæн. Аргъ ын кодтой хи фыды хуызæн. 1999-æм азы æфсады инæлар йæ цардæй ахицæн. Алагиры районы арæнхъахъхъæнджыты бынат «Бурон» ныр 25 азы хæссы йæ ном. Ацы бонты Вадим Матросовы мысынц, паддзахадон арæнтæ кæимæ хъахъхъæдта, уыцы æфсæддонтæ. Бæлвырддæр хабæрттæ радзурдзæн Чехойты Фатимæ.
Йæ цыртдзæвæнæй лæмбынæг кæсы, иу куыстыл хæст кæимæ уыд, уыдонмæ. Буроны арæнгæсуатæн 25 азы размæ радтой Советон Цæдисы хъæбатыр, æфсады инæлар Вадим Матросовы ном. Арæнхъахъхъæнджытæ йæ сæ зæрдыл дарынц, æмæ йæ ног фæлтæртæм хæццæ кæнынц. Уыдон ын йæ цыртдзæвæнмæ кадджын мадзалы рæстæг æрбахастой дидинджытæ.
Вадим Матросовы номхæссæг арæнгæсуаты бæрны ис бæстæйы арæны 200 километры. Цæуы Кавказы сæйраг хæхты сæрты. Советон Цæдисы хъайтар рæнхъон æфсæддонæй сси инæлар. Йæ цард арæнхъахъхъæнджытæн сси легендæ. Хæхты астæу æвæрд ис йæ цыртдзæвæн. Бæстæйы арæнхъхъæнæг уæвгæйæ, уыдис фидар æмæ ныфсджын. Æфсæддон оркестр æмæ быдырон цæлгæнæн – инæлары ном мысæн мадзал арæзт æрцыд æфсады хуыздæр традицитæм гæсгæ. Уыцы бон арæнхъахъхъæнджыты фарсмæ уыдысты, сæрдыгон лагерь Тæмисчъы сæ фæллад цы сывæллæтæ уадзынц, уыдон. Патиротон куысты фæлгæты ардæм æрбаластой сывæллæтты, скодтой сын экскурси, равдыстой сын управленийы истори æмæ йæ куысты тыххæй документалон киноныв, фенын сын кодтой хæцæнгæрзты хуызтæ. Уыдонмæ уæлдай цымыдисдзинад сæвзæрын кодтой Калашниковы æмæ Драгуновы хæцæнгæрзтæ. Ахуыр сæ кодтой хæцæнгæрзтæ рæстæгмæ райхалын æмæ æмбырд кæнын.
Арæнгæсуат ифтонг у æппæт кусæнгæрзтæй. Райдзаст агъуыстытæ, хæрæндон, найæн бынæттæ. Йæ фарсмæ сарæзтой хæдзар офицертæ æмæ сæ бинонтæн. Ам æрбынат кодтой куыстуаты 4 хайы: арæнгæсуат йæхæдæг, уадзæн пункт «Дæллаг Зæрæмæг», æмæ «Бурон»-ы хайады управлени. Арæнгæсуат зындгонд инæлары ном кæй хæссы, уый æфсæддонтæ нымайынц стыр кадыл.
Сæйраг арæнхъахъхъæнæг Вадим Матросовы ном дарддæр дæр йе *ххуысы хай хæссы Паддзахадон арæнтæ хъахъхъæнынадмæ. Федералон æдасдзинады службæйы арæнхъахъхъæнджытæ сты, нæ бæстæйы сабырдзинад кæй руаджы ныффидар, уыцы æфсæддонты иу хай. Æнæпилотон тæхæг системæтæ, радиолокацион станцæтæ, тепловизортæ, дардмæ кæсæн комплекстæ. Арæнхъахъхъæнджытæ æххæст сты нырыккон техникон фæрæзты алы хуызтæй.
