Æрæджы та радон къорд ссыд Дыгуры районы Урсдоны сывæллæтты лагерьмæ
Цæгат Ирыстон цæстдариуæг кæны Запорожьейы областы Черниговы районæн. Нæ республикæйы специалисттæ уым кусынц алы къабæзты: арæзтады, цæрæнуæтты-коммуналон хæдзарады, бындуронæй цалцæг кæнынц ахуырадон куыстуæттæ. Нæ республикæйы сæргълæууæг Сергей Меняйлойы амындмæ гæсгæ Черниговы районæй сывæллæттæ сæ фæллад уадзынмæ æмæ се *нæниздзинад фидар кæнынмæ фыццаг хатт не сты Цæгат Ирыстоны. Æрæджы та радон къорд ссыд Дыгуры районы Урсдоны сывæллæтты лагерьмæ. Нæ уацхæссæг фембæлд нæ республикæйы уазджытимæ æмæ аныхас кодта семæ.
Хъæлдзæг зарджытæ æмæ девизтæ, сывæллæтты мидбылхудт… Фæлладуадзджыты ног фæлтæр бахъæлдзæг кодтой пансионат. Ацы хатт Урсдонмæ æрцыдысты сабитæ æрмæст Цæгат Ирыстоны районтæй нæ, фæлæ Донецкæй æмæ Запорожьейы облæсты Черниговы районæй дæр. Уыдонæй иутæ нæ республикæйы сты фыццаг хатт. Ивгъуыд азты ам сæ фæллад цы сывæллæттæ уагътой, уыдоны та ногæй фæндыд ссæуын Цæгат Ирыстонмæ.
Сывæллæттæм æнхъæлмæ кæсынц цымыдисаг дыууæ къуырийы. Уыдон фендзысты Ирыстоны рæсугъддæр бынæттæ. Базонгæ уыдзысты не *гъдæуттимæ. Сæйрагдæр та – ам сæ рæстæг æрвитдзысты æдасæй.
Ирхæфсæн мадзæлтты архайынæй уæлдай ма сывæллæттæ фидар кæндзысты се *нæниздзинад дæр. Дзæбæхгæнæн ваннæтæ, массажтæ, физиопроцедурæтæ… Ахæм реабилитаци хорзырдæм фæбæрæг уыдзæн се *нæниздзинадыл.
Зæрдæбын æнкъарæнтæ райсыны тыххæй бирæты фæнды ацы пансионатмæ. Цæмæй уыцы рæстæгмæ ферох уой, цы зындзинæдтæ бавзæрстой, уыдон æмæ хъæлдзæгæй æрвитой сæ сабибонтæ.
Раздæр азты ма нæ республикæйы чи уыд, уыдон æй сæ зæрдыл дардтой, мысыдысты йæ, фæндыд сæ ногæй абалц кæнын Ирыстонмæ.
